mohabbat ki jis ko KHumari lage

mohabbat kī jis ko ḳhumārī lage

biyāhī bhī us ko kuñvārī lage

huī umr sattar bahattar magar

ġharāre meñ goTā-kanārī lage

haqīqat to ye hai ki bād-e-sumūm

javānī meñ bād-e-bahārī lage

jo baiThā hai bagulā bhagat kī tarah

vahī ham ko aslī shikārī lage

jo khelā halākū ne chañgez ne

vo khel ab bhī duniyā meñ jaarī lage

adab meñ bhī jaarī ḳharīd o faroḳht

jise dekho vo byopārī lage

siyāsat meñ aisī uchhal-kūd hai

ki har ek netā madārī lage

ye ġhurbat ye fāqoñ kā ik silsila

hameñ to ye roza hazārī lage

hamārī ra.ūnat bhī kyā chiiz hai

ki yāroñ ko vo ḳhāksārī lage

jo samjhe mohabbat ko ik chokleT

yaqīnan havas kā chusārī lage

nibhā.ūñgā pakḌā hai jab us kā haath

khaTārā lage yā khaTārī lage

lageñ zahr ham ko 'zafar' vāldain

magar apnī dulhan dulārī lage

mohabbat ki jis ko KHumari lage

biyahi bhi us ko kunwari lage

hui umr sattar bahattar magar

gharare mein goTa-kanari lage

haqiqat to ye hai ki baad-e-sumum

jawani mein baad-e-bahaari lage

jo baiTha hai bagula bhagat ki tarah

wahi hum ko asli shikari lage

jo khela halaku ne changez ne

wo khel ab bhi duniya mein jari lage

adab mein bhi jari KHarid o faroKHt

jise dekho wo byopari lage

siyasat mein aisi uchhal-kud hai

ki har ek neta madari lage

ye ghurbat ye faqon ka ek silsila

hamein to ye roza hazari lage

hamari raunat bhi kya chiz hai

ki yaron ko wo KHaksari lage

jo samjhe mohabbat ko ek chokleT

yaqinan hawas ka chusari lage

nibhaunga pakDa hai jab us ka hath

khaTara lage ya khaTari lage

lagen zahr hum ko 'zafar' waldain

magar apni dulhan dulari lage