mulla-ji ki biwi ka jawab

chauthī shādī kar ke mullā-jī bahut shādāñ hue

apnī qismat kī bulandī dekh kar nāzāñ hue

yuuñ javānoñ kī tarah laa.e dulhan ko saath meñ

aa ga.ī ho jaise sultāna kahīñ kī haath meñ

pahle hī din saare ghar kā jā.eza us ne liyā

apne shauhar kī nazar kā jā.eza us ne liyā

chaar kīleñ ḳhaas kamre meñ nazar aa.iiñ use

tiin kīloñ par dupaTTe bhī nazar aa.e Tañge

mullā-jī se us ne pūchhā ye dupaTTe kis ke haiñ

ye hai kis kis kī nishānī ye atīye kis ke haiñ

mullā-jī ne yuuñ diyā us ke savāloñ kā javāb

ai mirī pyārī dulhan ai āftāb o mahtāb

begamāt-e-sābiqa jo is jahāñ se uTh ga.iiñ

ye dupaTTe haiñ inhīñ kī yādgār-e-dil-nashīñ

jab tum is duniyā se uTh jāogī ai jān-e-jahāñ

tab tumhārā bhī dupaTTa Taañg dūñgā maiñ yahāñ

bolīñ begam maut ke panje meñ shauhar aa.egā

ab dupaTTe kā nahīñ Topī kā number aa.egā

chauthi shadi kar ke mulla-ji bahut shadan hue

apni qismat ki bulandi dekh kar nazan hue

yun jawanon ki tarah lae dulhan ko sath mein

aa gai ho jaise sultana kahin ki hath mein

pahle hi din sare ghar ka jaeza us ne liya

apne shauhar ki nazar ka jaeza us ne liya

chaar kilen KHas kamre mein nazar aain use

tin kilon par dupaTTe bhi nazar aae Tange

mulla-ji se us ne puchha ye dupaTTe kis ke hain

ye hai kis kis ki nishani ye atiye kis ke hain

mulla-ji ne yun diya us ke sawalon ka jawab

ai meri pyari dulhan ai aaftab o mahtab

begamat-e-sabiqa jo is jahan se uTh gain

ye dupaTTe hain inhin ki yaadgar-e-dil-nashin

jab tum is duniya se uTh jaogi ai jaan-e-jahan

tab tumhaara bhi dupaTTa Tang dunga main yahan

bolin begam maut ke panje mein shauhar aaega

ab dupaTTe ka nahin Topi ka number aaega