mushaera hoga

bas ek hafte meñ apnā mushā.era hogā

huā hai bhābī ke beTā mushā.era hogā

na sāz-o-raqs kī mahfil na bazm-e-qavvālī

hamārī shādī meñ tanhā mushā.era hogā

tumhīñ batāo gale-bāz shā.eroñ ke baġhair

agar huā bhī to kaisā mushā.era hogā

uThīñ hazār sadā.eñ mushā.ere ke ḳhilāf

hamārā da.avā hai hogā mushā.era hogā

bilā bulā.e bhī mumkin huā to jā.ūñgā

kisī kā hogā kahīñ kā mushā.era hogā

jo bad-nasībī se kal ko mulāzmat na rahī

shikam kā apne sahārā mushā.era hogā

kiyā hai aane kā va.ada ḳhumār-sāhab ne

hameñ yaqīñ hai ki achchhā mushā.era hogā

kisī kā jashn-e-vilādat kisī kā yaum-e-vafāt

yūñhī hamesha hamārā mushā.era hogā

sunā hai baap banegā ab ek bachche kā

hamāre saale kā saalā mushā.era hogā

hamāre shahr meñ haiñ 'pāpular' bahut shā.er

sab aa.eñ to ka.ī din kā mushā.era hogā

bas ek hafte mein apna mushaera hoga

hua hai bhabi ke beTa mushaera hoga

na saz-o-raqs ki mahfil na bazm-e-qawwali

hamari shadi mein tanha mushaera hoga

tumhin batao gale-baz shaeron ke baghair

agar hua bhi to kaisa mushaera hoga

uThin hazar sadaen mushaere ke KHilaf

hamara dawa hai hoga mushaera hoga

bila bulae bhi mumkin hua to jaunga

kisi ka hoga kahin ka mushaera hoga

jo bad-nasibi se kal ko mulazmat na rahi

shikam ka apne sahaara mushaera hoga

kiya hai aane ka wada KHumar-sahab ne

hamein yaqin hai ki achchha mushaera hoga

kisi ka jashn-e-wiladat kisi ka yaum-e-wafat

yunhi hamesha hamara mushaera hoga

suna hai bap banega ab ek bachche ka

hamare sale ka sala mushaera hoga

hamare shahr mein hain 'papular' bahut shaer

sab aaen to kai din ka mushaera hoga