music director

kabhī saare kabhī gaamā kabhī pādhā kabhī niisā

masāla jaan kar is nai sadā har giit ko paisā

kabhī us ne milā dekhā jo muulī ko chuqandar se

to laayā duur kī kauḌī ye sargam ke samundar se

banā.ī jo bhī tarz us ne vo fan kī jaan hotī thī

ki us meñ uuñT kī gardan se lambī taan hotī thī

nahīñ thā chor lekin koī tohmat aa bhī jaatī thī

kisī kī dhun se us kī dhun kabhī Takrā bhī jaatī thī

kiye haiñ bhānje recording meñ shāmil-e-bājā

likhāyā giit bāvarchī se us ne ''āsūre-rājā

ye aksar shā.iroñ ko be-tarah islāh detā hai

aur us par apne sāzindoñ se khul kar daad letā hai

mohūrat par sadā us ke lage meñ haar hote the

zarūrat par use do ghoñT bhī darkār hote the

barhaman ko gavā.īñ Thumriyāñ is ne shivāle meñ

ḳhudā-baḳhshe bahut sī ḳhūbiyāñ thiiñ marne vaale meñ

kabhi sare kabhi gama kabhi padha kabhi nisa

masala jaan kar is nai sada har git ko paisa

kabhi us ne mila dekha jo muli ko chuqandar se

to laya dur ki kauDi ye sargam ke samundar se

banai jo bhi tarz us ne wo fan ki jaan hoti thi

ki us mein unT ki gardan se lambi tan hoti thi

nahin tha chor lekin koi tohmat aa bhi jati thi

kisi ki dhun se us ki dhun kabhi Takra bhi jati thi

kiye hain bhanje recording mein shamil-e-baja

likhaya git bawarchi se us ne aasure-raja

ye aksar shairon ko be-tarah islah deta hai

aur us par apne sazindon se khul kar dad leta hai

mohurat par sada us ke lage mein haar hote the

zarurat par use do ghonT bhi darkar hote the

barhaman ko gawain Thumriyan is ne shiwale mein

KHuda-baKHshe bahut si KHubiyan thin marne wale mein