pension-yafta

na ab maiñ pyaar kar saktā huuñ aur na DaañT saktā huuñ

jo baaqī rah ga.e haiñ din unheñ bas kaaT saktā huuñ

jo mil jaa.e usī par iktifā karnā hī paḌtā hai

koī shai apnī marzī se na ab maiñ chhāñT saktā huuñ

huā huuñ jab se pension-yāfta ye haal hai yaaro

na koī qarz detā hai na pension baañT saktā huuñ

yahī kyā kam hai ḳhud-muḳhtār huuñ maiñ jab bhī jī chāhe

tamannāoñ ke par uḌne se pahle kaaT saktā huuñ

maiñ apne vaqt ke hāthoñ meñ huuñ jaise chhaTī unglī

na isti.māl kar saktā huuñ aur na kaaT saktā huuñ

ġhamoñ kī khiir TeḌhī hī nahīñ gāḌhī bhī hotī hai

na pī jaatī hai ye aur na ise maiñ chaaT saktā huuñ

uḌā kar dekh le koī patangeñ apnī sheḳhī kī

bulandī par agar hoñ bhī to kanne kaaT saktā huuñ

yahī taufīq kyā kam hai ki rotoñ ko hañsā kar maiñ

dukhoñ kā bojh kam kar ke ġhamoñ ko baañT saktā huuñ

ḳhalīj-e-buġhz-o-nafrat gar diloñ meñ ho ga.ī paidā

ise maiñ 'ḳhvāh-maḳhvāh' hañste hañsāte paaT saktā huuñ

na ab main pyar kar sakta hun aur na DanT sakta hun

jo baqi rah gae hain din unhen bas kaT sakta hun

jo mil jae usi par iktifa karna hi paDta hai

koi shai apni marzi se na ab main chhanT sakta hun

hua hun jab se pension-yafta ye haal hai yaro

na koi qarz deta hai na pension banT sakta hun

yahi kya kam hai KHud-muKHtar hun main jab bhi ji chahe

tamannaon ke par uDne se pahle kaT sakta hun

main apne waqt ke hathon mein hun jaise chhaTi ungli

na istimal kar sakta hun aur na kaT sakta hun

ghamon ki khir TeDhi hi nahin gaDhi bhi hoti hai

na pi jati hai ye aur na ise main chaT sakta hun

uDa kar dekh le koi patangen apni sheKHi ki

bulandi par agar hon bhi to kanne kaT sakta hun

yahi taufiq kya kam hai ki roton ko hansa kar main

dukhon ka bojh kam kar ke ghamon ko banT sakta hun

KHalij-e-bughz-o-nafrat gar dilon mein ho gai paida

ise main 'KHwah-maKHwah' hanste hansate paT sakta hun