allama-iqbaal ko shikwa

kisī se ḳhvāb meñ 'iqbāl' ne ye farmāyā

ki tū ne kar diyā barbād merā sarmāya

mirā kalām gavayyoñ ko sauñpne vaale

nazar na aa.e tujhe mere qalb ke chhāle

maiñ chāhtā thā musalmān muttahid ho jaa.eñ

ye kab kahā thā ki ham bahr-e-munjamid ho jaa.eñ

mirī ye shaan ki dariyā bhī thā mirā muhtāj

tirā ye haal ki mulkoñ se māñgtā hai ḳhirāj

kahā thā maiñ ne ġharībī meñ naam paidā kar

ye kab kahā thā ki māl-e-harām paidā kar

mirā tarīq amīrī nahīñ faqīrī hai

tirī ḳhurāk chapātī nahīñ ḳhamīrī hai

ilaaj ātish-e-rūmī ke soz meñ hai tirā

ḳhayāl shabnam o zebā ke pose meñ hai tirā

mire kalām se tujh ko sabaq zarā na milā

kahāñ kī rāh-e-haram ghar kā rāsta na milā

ḳhudī buland ho be-shak yahī thī merī raa.e

ye kab kahā thā ki qavvāl is meñ haath lagā.e

kisi se KHwab mein 'iqbaal' ne ye farmaya

ki tu ne kar diya barbaad mera sarmaya

mera kalam gawayyon ko saunpne wale

nazar na aae tujhe mere qalb ke chhaale

main chahta tha musalman muttahid ho jaen

ye kab kaha tha ki hum bahr-e-munjamid ho jaen

meri ye shan ki dariya bhi tha mera muhtaj

tera ye haal ki mulkon se mangta hai KHiraj

kaha tha main ne gharibi mein nam paida kar

ye kab kaha tha ki mal-e-haram paida kar

mera tariq amiri nahin faqiri hai

teri KHurak chapati nahin KHamiri hai

ilaj aatish-e-rumi ke soz mein hai tera

KHayal shabnam o zeba ke pose mein hai tera

mere kalam se tujh ko sabaq zara na mila

kahan ki rah-e-haram ghar ka rasta na mila

KHudi buland ho be-shak yahi thi meri rae

ye kab kaha tha ki qawwal is mein hath lagae