roTi kapDa aur makan

dil jal rahe haiñ dosto ġham ke alaav meñ

bachche bhī mubtalā haiñ dimāġhī tanāv meñ

paanī kī tarah bahtī hai daulat chunāv meñ

yak-jehtī kā to naam nahīñ rakh-rakhāv meñ

ik aadmī ke vāste patlūn, shirt, coat

ik aadmī ke vāste mumkin nahīñ lañgoT

ik ghar meñ itnī roTiyāñ khaa.e nahīñ baneñ

ik ghar kā hai ye haal ki sattū nahīñ saneñ

ik ghar meñ itnī raushnī āñkheñ nahīñ khuleñ

ik ghar meñ ghāsleT ke dīpak nahīñ jaleñ

kutte kisī ke sair ko motor pe jaa.e haiñ

qismat ke dar pe baiTh ke kuchh dum hilā.e haiñ

ye kaun sochtā hai barābar hai aadmī

daulat hai jis ke paas vo behtar hai aadmī

vo aadmī nahīñ jo phaTīchar hai aadmī

rāheñ tavīl aur khule sar hai aadmī

usiyā rahā hai vo jo ġharībī kī os meñ

pakvān pak rahe haiñ usī ke paḌos meñ

sehn-e-chaman meñ kuchh pas-e-dīvār haiñ khaḌe

ya.anī avaam jaan se bezār haiñ khaḌe

daftar meñ rozgār ke be-kār haiñ khaḌe

line meñ aspatāl kī bīmār haiñ khaḌe

roTī agar na paa.ī to patthar uThā.eñge

bhūke kabhī na bhuuk meñ malhār gā.eñge

aalam ye daftaroñ kā hai yārān-e-tez-gām

phailā har ek gaam hai rishvat kā ek daam

afsar bhī be-nakel haiñ staff be-lagām

jantā kā hai ye haal ki kartī hai raam raam

mausam ko dekh-bhāl ke file baḌhā.e haiñ

daftar meñ laḌkiyāñ bhī to switer banā.e haiñ

raushan karo charāġh vo daur-e-siyāh meñ

khaa.e na koī Thokareñ koī roTī kī chaah meñ

ġhurbat aḌī huī hai taraqqī kī raah meñ

yaksāñ sabhī hoñ log tumhārī nigāh meñ

tartīb do chaman baḌhī shāḳhoñ ko chhāñT do

daulat ko aadmī pe barābar se baañT do

dil jal rahe hain dosto gham ke alaw mein

bachche bhi mubtala hain dimaghi tanaw mein

pani ki tarah bahti hai daulat chunaw mein

yak-jehti ka to nam nahin rakh-rakhaw mein

ek aadmi ke waste patlun, shirt, coat

ek aadmi ke waste mumkin nahin langoT

ek ghar mein itni roTiyan khae nahin banen

ek ghar ka hai ye haal ki sattu nahin sanen

ek ghar mein itni raushni aankhen nahin khulen

ek ghar mein ghasleT ke dipak nahin jalen

kutte kisi ke sair ko motor pe jae hain

qismat ke dar pe baiTh ke kuchh dum hilae hain

ye kaun sochta hai barabar hai aadmi

daulat hai jis ke pas wo behtar hai aadmi

wo aadmi nahin jo phaTichar hai aadmi

rahen tawil aur khule sar hai aadmi

usiya raha hai wo jo gharibi ki os mein

pakwan pak rahe hain usi ke paDos mein

sehn-e-chaman mein kuchh pas-e-diwar hain khaDe

yani awam jaan se bezar hain khaDe

daftar mein rozgar ke be-kar hain khaDe

line mein aspatal ki bimar hain khaDe

roTi agar na pai to patthar uThaenge

bhuke kabhi na bhuk mein malhaar gaenge

aalam ye daftaron ka hai yaran-e-tez-gam

phaila har ek gam hai rishwat ka ek dam

afsar bhi be-nakel hain staff be-lagam

janta ka hai ye haal ki karti hai ram ram

mausam ko dekh-bhaal ke file baDhae hain

daftar mein laDkiyan bhi to switer banae hain

raushan karo charagh wo daur-e-siyah mein

khae na koi Thokaren koi roTi ki chah mein

ghurbat aDi hui hai taraqqi ki rah mein

yaksan sabhi hon log tumhaari nigah mein

tartib do chaman baDhi shaKHon ko chhanT do

daulat ko aadmi pe barabar se banT do