sarangi aur tabla

duniyā-bhar ke be-fikroñ ne kal bazm-e-surūd sajā.ī thī

kyā dil ko masaltā thā tabla kyā sārañgī ghabrā.ī thī

bismil kī rag-e-jāñ bantī thī tā.ūs kī tāreñ larzish se

chaa.e kā pyāla daur meñ thā huqqe ne dhuum machā.ī thī

rindoñ ne jhanDe gaaḌe the zabbād ne Dere Daale the

is dair o haram kī mahfil meñ mausīqī gaane aa.ī thī

haañ ashkoñ se pur sārañgī vaañ pech-o-tāb meñ thā tabla

gaz-bhar kī zabāñ yaañ chaltī thī vaañ hāthoñ kī ban aa.ī thī

vaañ thaap ke abr garajte the naġhmoñ kī phuvāreñ paḌtī thiiñ

yaañ har dil par mausīqī ke kohre ne qanāt lagā.ī thī

uḌtī thiiñ fazā-bhar meñ tāneñ thī chaal sabā kī mastāna

taqdīr se biich meñ donoñ ke jā baiThā shā.er-e-dīvāna

sārañgī bole table se tum yūñhī shor machāte ho

ai muñh-phaT table dīvāne kyuuñ kaan hamāre khāte ho

āvāz tumhārī kavve sī aur shakl chhalāve sī terī

in mīThī mīThī tānoñ ke tum rañg meñ bhañg milāte ho

lānat hai tumhāre jiine par ārām nahīñ izzat bhī nahīñ

maiñ godoñ meñ jā phailtī huuñ tum sar apnā piTvāte ho

hai ḳhaam abhī tak ishq tirā kuchh sabr nahīñ kuchh taab nahīñ

yaañ taan aḌī ik mīThī sī vaañ thaam ke dil rah jaate ho

maiñ rāj-dulārī albelī naarī huuñ prem-kanhiyā huuñ

tum mūñDī-kāTe mardak ho barjā par dhakke khāte ho

tahzīb tumheñ manzūr nahīñ aur aql kahīñ dastūr nahīñ

tum bhiim kī tānoñ meñ bāhar kyuuñ aape se ho jaate ho

nāzoñ se palī shahzādī huuñ maiñ naarī mahloñ vaalī huuñ

tum jis davām ke qaidī ho sandūqoñ meñ DaT jaate ho

jab sārañgī ne table se yuuñ dil-shiknī kā kalām kiyā

kuchh der to vo ḳhāmosh rahā phir bhābhī-jāñ ko salām kiyā

yuuñ kahne lagā sārañgī se jaltī par tel girātī ho

ham rañj-o-alam ke maare haiñ tum aakar aur satātī ho

mushtāq se muñh pherā kyuuñ hai phir tum ne hameñ aa gherā kyuuñ

rahne do ise chup majbūrān kyuuñ merī zabāñ khulvātī ho

maiñ ranjībār kā shahzāda maidān meñ aakar zaiġham sā

jab ek dahāḌ lagātā huuñ tum pardoñ meñ Dar jaatī ho

paimān-e-vafā jis se bāñdhūñ maiñ paas usī ke rahtā huuñ

tum harjā.ī ho har ik ke pahlū meñ dil bahlātī ho

kuchh lutf hai sīna-kobī meñ sar phoḌne meñ ham-mastoñ ko

bī-bī ye ishq ke zevar haiñ tum yūñhī ham ko banātī ho

izzat pe hamārī harf-zanī allāh ġhanī allāh ġhanī

vo vaqt baḌī-bī bhuul ga.iiñ jab kaam apne kachhvātī ho

maiñ terī shamīm-e-naġhma ko mānind-e-nasīm uḌātā huuñ

ye merī thaap kī barkat hai dil bazm meñ masle jaatī huuñ

jab laḌke mil kar gaate haiñ irfān kī tāneñ uḌāte haiñ

hāthoñ se mez bajāte haiñ tum yaad kab un ko aatī ho

hai malka-e-mausīqī se mujhe nazdīk-tarīñ tujh se rishta

ham raah pe tujh ko laate haiñ jab lai meñ bhaTak sī jaatī ho

maiñ aazar ishq kī tābish se dil mahfil ke garmātā huuñ

tā.ūs tambūre ko taj kar din meñ taare dikhlātā huuñ

ye sun kar shamsuddīn Dare talvār mabādā chal jaa.e

yaañ tabla taḌaptā rah jaa.e sārañgī rotī rah jaa.e

chumkār ke sārañgī se kahā tum sīdhī-sādī bholī ho

zebā nahīñ gar yuuñ muñh meñ tire an-jānoñ kī sī bolī ho

table ke vakīl-e-mutlaq ne vaañ haath se us ko samjhāyā

achchhā nahīñ ḳhuuñ kī lahroñ se gar mahfil-bhar meñ holī ho

tum zenjībār ke shahzāde sārañgī sārañgī Thahrī

phabtī hī nahīñ shahzādoñ ke gar aisī bolī Tholī ho

ḳhāmosh huiiñ bī-sārañgī aur tabla summun-bukmun thā

yuuñ jaise kisī ne zabāñ apnī kausar ke aab se dho lī ho

al-qissa bichhḌe dost mile nai jhagḌā thā nai shikva thā

nai tan-tanā-tan-tan-tan thī tākaḌ-dhayyā-dhayyā thā

duniya-bhar ke be-fikron ne kal bazm-e-surud sajai thi

kya dil ko masalta tha tabla kya sarangi ghabrai thi

bismil ki rag-e-jaan banti thi taus ki taren larzish se

chae ka pyala daur mein tha huqqe ne dhum machai thi

rindon ne jhanDe gaDe the zabbaad ne Dere Dale the

is dair o haram ki mahfil mein mausiqi gane aai thi

han ashkon se pur sarangi wan pech-o-tab mein tha tabla

gaz-bhar ki zaban yan chalti thi wan hathon ki ban aai thi

wan thap ke abr garajte the naghmon ki phuwaren paDti thin

yan har dil par mausiqi ke kohre ne qanat lagai thi

uDti thin faza-bhar mein tanen thi chaal saba ki mastana

taqdir se bich mein donon ke ja baiTha shaer-e-diwana

sarangi bole table se tum yunhi shor machate ho

ai munh-phaT table diwane kyun kan hamare khate ho

aawaz tumhaari kawwe si aur shakl chhalawe si teri

in miThi miThi tanon ke tum rang mein bhang milate ho

lanat hai tumhaare jine par aaram nahin izzat bhi nahin

main godon mein ja phailti hun tum sar apna piTwate ho

hai KHam abhi tak ishq tera kuchh sabr nahin kuchh tab nahin

yan tan aDi ek miThi si wan tham ke dil rah jate ho

main raj-dulari albeli nari hun prem-kanhiya hun

tum munDi-kaTe mardak ho barja par dhakke khate ho

tahzib tumhein manzur nahin aur aql kahin dastur nahin

tum bhim ki tanon mein bahar kyun aape se ho jate ho

nazon se pali shahzadi hun main nari mahlon wali hun

tum jis dawam ke qaidi ho sanduqon mein DaT jate ho

jab sarangi ne table se yun dil-shikni ka kalam kiya

kuchh der to wo KHamosh raha phir bhabhi-jaan ko salam kiya

yun kahne laga sarangi se jalti par tel giraati ho

hum ranj-o-alam ke mare hain tum aakar aur satati ho

mushtaq se munh phera kyun hai phir tum ne hamein aa ghera kyun

rahne do ise chup majburan kyun meri zaban khulwati ho

main ranjibar ka shahzada maidan mein aakar zaigham sa

jab ek dahaD lagata hun tum pardon mein Dar jati ho

paiman-e-wafa jis se bandhun main pas usi ke rahta hun

tum harjai ho har ek ke pahlu mein dil bahlati ho

kuchh lutf hai sina-kobi mein sar phoDne mein ham-maston ko

bi-bi ye ishq ke zewar hain tum yunhi hum ko banati ho

izzat pe hamari harf-zani allah ghani allah ghani

wo waqt baDi-bi bhul gain jab kaam apne kachhwati ho

main teri shamim-e-naghma ko manind-e-nasim uData hun

ye meri thap ki barkat hai dil bazm mein masle jati hun

jab laDke mil kar gate hain irfan ki tanen uDate hain

hathon se mez bajate hain tum yaad kab un ko aati ho

hai malka-e-mausiqi se mujhe nazdik-tarin tujh se rishta

hum rah pe tujh ko late hain jab lai mein bhaTak si jati ho

main aazar ishq ki tabish se dil mahfil ke garmata hun

taus tambure ko taj kar din mein tare dikhlata hun

ye sun kar shamsuddin Dare talwar mabaada chal jae

yan tabla taDapta rah jae sarangi roti rah jae

chumkar ke sarangi se kaha tum sidhi-sadi bholi ho

zeba nahin gar yun munh mein tere an-jaanon ki si boli ho

table ke wakil-e-mutlaq ne wan hath se us ko samjhaya

achchha nahin KHun ki lahron se gar mahfil-bhar mein holi ho

tum zenjibar ke shahzade sarangi sarangi Thahri

phabti hi nahin shahzadon ke gar aisi boli Tholi ho

KHamosh huin bi-sarangi aur tabla summun-bukmun tha

yun jaise kisi ne zaban apni kausar ke aab se dho li ho

al-qissa bichhDe dost mile nai jhagDa tha nai shikwa tha

nai tan-tana-tan-tan-tan thi takaD-dhayya-dhayya tha