shaer-e-azam

kal ik adiib o shā.er o nāqid mile hameñ

kahne lage ki aao zarā bahs hī kareñ

karne lage ye bahs ki ab hind o paak meñ

vo kaun hai ki shā.er-e-āzam jise kaheñ

maiñ ne kahā 'jigar' to kahā dead ho chuke

maiñ ne kahā ki 'josh' kahā qadr kho chuke

maiñ ne kahā 'firāq' kī azmat pe tabsira

bole 'firāq' shā.er-e-āzam arā-rarā

maiñ ne kahā 'nadīm' to bole ki journalist

maiñ ne kahā 'ra.īs' to bole satirist

maiñ ne kahā ki hazrat-e-'māhir' bhī ḳhuub haiñ

kahne lage ki un ke yahāñ bhī uyuub haiñ

maiñ ne kahā kuchh aur to bole ki chup raho

maiñ chup rahā to kahne lage aur kuchh kaho

maiñ ne kahā ki 'sāhir' o 'majrūh' o jāñ-nisār

bole ki shā.iroñ meñ na kiije inheñ shumār

maiñ ne kahā kalām-e-'ravish' lā-javāb hai

kahne lage ki un kā tarannum ḳharāb hai

maiñ ne kahā tarannum-e-'anvar' pasand hai

kahne lage ki un kā vatan deoband hai

maiñ ne kahā ki un kī ġhazal sāf-o-pāk hai

bole ki un kī shakl baḌī ḳhaufnāk hai

maiñ ne kahā ki ye jo haiñ 'mahshar'-ināyatī?

kahne lage ki rañg hai un kā rivāyatī

maiñ ne kahā 'qamar' kā taġhazzul hai dil-nashīñ

kahne lage ki un meñ to kuchh jaan hī nahīñ

maiñ ne kahā 'niyāz' to bole ki aib haiñ

maiñ ne kahā 'surūr' to bole ki nukta-chīñ

maiñ ne kahā 'zarīf' to bole ki gandagī

maiñ ne kahā 'salām' to bole ki bandagī

maiñ ne kahā 'farāz' to bole ki zer-o-bam

maiñ ne kahā 'adam' to kahā vo bhī kal-adam

maiñ ne kahā 'ḳhumār' kahā fan meñ kachche haiñ

maiñ ne kahā ki 'shād' to bole ki bachche haiñ

maiñ ne kahā ki tanz-nigāroñ meñ dekhiye

bole ki saikaḌoñ meñ hazāroñ meñ dekhiye

maiñ ne kahā ki shā.er-e-āzam haiñ 'ja.afarī'

kahne lage ki aap kī hai un se dostī

maiñ ne kahā ki ye jo haiñ 'mahshar'-ināyatī

kahne lage ki aap haiñ un ke himāyatī

maiñ ne kahā 'zamīr' ke hiyumar meñ fikr hai

bole ye kis kā naam liyā kis kā zikr hai

maiñ ne kahā ki ye jo dilāvar-figār haiñ

bole ki vo to sirf zarāfat-nigār haiñ

maiñ ne kahā mizāh meñ ik baat bhī to hai

bole ki is ke saath ḳhurāfāt bhī to hai

maiñ ne kahā to shā.er-e-āzam koī nahīñ

kahne lage ki ye bhī koī lāzmī nahīñ

maiñ ne kahā to kis ko meñ shā.er baḌā kahūñ

kahne lage ki maiñ bhī isī kashmakash meñ huuñ

pāyān-e-kār ḳhatm huā jab ye tajziya

maiñ ne kahā huzūr to bole ki shukriya

kal ek adib o shaer o naqid mile hamein

kahne lage ki aao zara bahs hi karen

karne lage ye bahs ki ab hind o pak mein

wo kaun hai ki shaer-e-azam jise kahen

main ne kaha 'jigar' to kaha dead ho chuke

main ne kaha ki 'josh' kaha qadr kho chuke

main ne kaha 'firaq' ki azmat pe tabsira

bole 'firaq' shaer-e-azam ara-rara

main ne kaha 'nadim' to bole ki journalist

main ne kaha 'rais' to bole satirist

main ne kaha ki hazrat-e-'mahir' bhi KHub hain

kahne lage ki un ke yahan bhi uyub hain

main ne kaha kuchh aur to bole ki chup raho

main chup raha to kahne lage aur kuchh kaho

main ne kaha ki 'sahir' o 'majruh' o jaan-nisar

bole ki shairon mein na kije inhen shumar

main ne kaha kalam-e-'rawish' la-jawab hai

kahne lage ki un ka tarannum KHarab hai

main ne kaha tarannum-e-'anwar' pasand hai

kahne lage ki un ka watan deoband hai

main ne kaha ki un ki ghazal saf-o-pak hai

bole ki un ki shakl baDi KHaufnak hai

main ne kaha ki ye jo hain 'mahshar'-inayati?

kahne lage ki rang hai un ka riwayati

main ne kaha 'qamar' ka taghazzul hai dil-nashin

kahne lage ki un mein to kuchh jaan hi nahin

main ne kaha 'niyaz' to bole ki aib hain

main ne kaha 'surur' to bole ki nukta-chin

main ne kaha 'zarif' to bole ki gandagi

main ne kaha 'salam' to bole ki bandagi

main ne kaha 'faraaz' to bole ki zer-o-bam

main ne kaha 'adam' to kaha wo bhi kal-adam

main ne kaha 'KHumar' kaha fan mein kachche hain

main ne kaha ki 'shad' to bole ki bachche hain

main ne kaha ki tanz-nigaron mein dekhiye

bole ki saikaDon mein hazaron mein dekhiye

main ne kaha ki shaer-e-azam hain 'jafari'

kahne lage ki aap ki hai un se dosti

main ne kaha ki ye jo hain 'mahshar'-inayati

kahne lage ki aap hain un ke himayati

main ne kaha 'zamir' ke hiyumar mein fikr hai

bole ye kis ka nam liya kis ka zikr hai

main ne kaha ki ye jo dilawar-figar hain

bole ki wo to sirf zarafat-nigar hain

main ne kaha mizah mein ek baat bhi to hai

bole ki is ke sath KHurafat bhi to hai

main ne kaha to shaer-e-azam koi nahin

kahne lage ki ye bhi koi lazmi nahin

main ne kaha to kis ko mein shaer baDa kahun

kahne lage ki main bhi isi kashmakash mein hun

payan-e-kar KHatm hua jab ye tajziya

main ne kaha huzur to bole ki shukriya