shamat-e-election

vaah bī municipality jaan kyā kahnā tirā

tū chachī lailā kī āshiq terā majnūñ kā chachā

apnī ḳhuddārī ko kho kar tujh pe jo shaidā huā

be-ḳhudī meñ ye zabān-e-hāl se kahte sunā

bas-ki dīvāna shudam aql-e-rasā darkār niist

āshiq-e-municipality rāhiyā darkār niist

terā ḳhvāhish-mand har qaid-e-līyāqat se barī

jis kā jī chāhe laḌe aur laḌ ke le le membarī

ahd-e-āzādī ne aisī Daal dī hai abtarī

ab to har tānīs aur tazkīr meñ hai hamsarī

tujh ko kyā ranDī hai koī yā ki ranDī-bāz hai

terā darvāza kas-o-nā-kas ke uupar baaz hai

jam.a kar de qarz hī le kar zamānat ke pachās

duur hotī jaa.e ġhairat jab election aa.e paas

votaroñ ke haath joḌe ḳhuub ho kar bad-havās

giḌgiḌā kar har kas-o-nā-kas se ho ye iltimās

rehn parche ke evaz izzat mirī kar lījiye

apne bachchoñ kā tasadduq vote mujh ko dījiye

suniye ik sāhab kā qissa jab huī shāmat savār

ye zamānat kar ke dāḳhil ban ga.e ummīd-vār

chhoḌ pesha tark farmāyā jo kuchh thā kārobār

kuchh asās-ul-bait bechā kuchh liyā suudī udhār

muztarib rahte the ye nām-āvarī ke vāste

ghar se nikle vote lene membarī ke vāste

sab se pahle un ko jis voter ke ghar jaanā paḌā

shaiḳh buddhū naam thā aur thā julāhā qaum kā

dhotī bāñdhe marza.ī pahne tanā baiThā huā

ik saḌī miTTī kā huqqa pī rahā thā kaj-adā

jaate hī taslīm kī jab is ko bā-sad-ehtirām

muñh ko TeḌhā kar ke bolā ko hai bālekum-salām''

bole ye pahle na aayā maiñ huā itnā qusūr

shaiḳh buddhū aap mujh par rahm farmā.eñ huzūr

aap ko vālid kahā karte the bhaa.ī ab se duur

maiñ bhatījā aap kā huuñ vote le lūñgā zarūr

bole buddhū kā kahiyo ham kehkā kehkā boTe deī

boTe pahiye uu jo tirte hamkā das kā note de.ī

jab surtedār bolā laa.e ho kauno gavāh

ham kahā sasūrā jamādarvā kihis ham kā tabāh

ham julāhā aap ke aur aap Thahre bādshāh

kaun kah ke sāmne mūtat hai sāhab vaah vaah

hañs ke kah deneñ mujhaD siikh jī jaao barī

rah ga.ī muñh haa.e ke sab lambaran kī lambarī

sun liyo saarī kathā diiho ki nāhīñ ye batāo

bote māñge aa.e ho ham se to ham kā kuchh dilāo

kar chikan bakvās ab bhayyā na hamrā muuḌ khaao

kah diyā bas kah diyā ab jaao chuppe ghar kā jaao

jo rakam tum se kahā sab peshgī le leb ham

boot de motor pe le jahiyo to haañ de deb ham

jab miyāñ buddhū ke tevar is qadar dekhe kaḌe

dahne baa.eñ dekh jhaT qadmoñ pe is ke gir paḌe

dil meñ pachhtā.e ki āḳhir kyuuñ hue the ham khaḌe

kahiye aise jāhiloñ se kyā koī kushtī laḌe

aabrū ke saath de kar pāñch raazī kar liyā

kāmyābī par hue ḳhush taao moñchhoñ par diyā

aage baḌh kar ek hazrat kā huā phir sāmnā

un se jā kar is tarah kī arz bā-sad-iltijā

banda parvar ek maz.hab hai hamārā aap kā

vote dījegā jo mujh ko aap ḳhush hogā ḳhudā

haiñ mire halqe meñ jo jo mere maz.hab ke ḳhilāf

dekhiye member zarā ho luuñ to kar duuñ sab ko saaf

mehtarāñ ke dar pe jhāḌū dene aa.e kyā majāl

aur saqqā mushk se naalī dhulā.e kyā majāl

tex ghar-vāre kā un par bañdh nā jaa.e kyā majāl

le leñ bambā ghar meñ be meter lagā.e kyā majāl

naach tignī kā inheñ ab maiñ nachā.ūñgā huzūr

dekhe kis kis tarah un ko satā.ūñgā huzūr

ḳhush hue sun kar janāb-e-maulvī-e-maktabī

haath pherā riish par aur is tarah taqrīr kī

aap is ke ahal haiñ merī nazar meñ vāqa.ī

zāt-e-sāmī ko samajhtā huuñ maiñ faḳhr-e-membarī

mohtaram maiñ va.ade qabl-az-vaqt kar saktā nahīñ

farz hai īfā-e-va.ada phir mukar saktā nahīñ

is meñ ik ishkāl-e-shara.ī aur bhī hai kyā kahūñ

meñ iānat aap kī bil-farz qirtāsan karūñ

raa.e to apnī hiba kar duuñ evaz kuchh bhī na luuñ

kyuuñ badal zaa.e.a karūñ kis vāste musrif banūñ

jāntā huuñ ye ki merī raa.e hai kitnī vāqī.a

muft zaa.e.a kyuuñ karūñ jab maiñ nahīñ hū mustatī.a

hasb-e-ḳhvāhish gar badal mujh ko atā kar deñ janāb

kyā ajab pesh-e-ḳhudā mājūr bhī huuñ aur masāb

maiñ ne dikhlā dī hudūd-e-shar.a meñ rāh-e-savāb

mere māruzāt ko farmā.iye gar mustajāb

raa.e de dene meñ ahqar ko ta.ammul kuchh na ho

ḳhud karūñ tājīl hatman phir tasāhul kuchh na ho

raa.e de dūñgā evaz maiñ aap ko ḳhamsīn ke

itne hī milte haiñ mujh ko va.az ke talqīn ke

hazrat-e-vālā to ḳhud pāband haiñ aa.iin ke

is se kam denā murādif hai mirī tauhīn ke

haañ ye mumkin hai ki kuchh taqlīl farmā dījiye

hai ye kār-e-ḳhair ab tājīl farmā dījiye

ḳhullas-e-ahbāb se kyuuñ istishāra kījiye

raaz poshīda rahe kyuuñ āshkāra kījiye

sab se achchhā hai zarā zahmat gavārā kījiye

lījiye tasbīh mujh se istiḳhāra kījiye

arz kī hai maiñ ne jo itnī raqam par dekhiye

man.a jab aa.e to phir kuchh is se kam par dekhiye

ye nihāyat kaa.eñ the dil meñ ye bole soch ke

shakl to achchhī hai par zebā nahīñ mere liye

istiḳhāra maiñ karūñ kyā aap ke hote hue

kartā huuñ niyyat to maiñ aap istiḳhāra kījiye

niyyat un ke dil meñ thī tasbīh un ke haath meñ

chuhā apnī ghaat meñ thā billī apnī ghaat meñ

man.a aaya istiḳhāra chhūTte hī pahlī baar

maulvī sāhab ke chehre par huā kuchh antr-jār

phir jo dekhā vājib aaya ho be-iḳhtiyār

pūchhā niyyat kis qadar par kī thī bahr-e-ḳhāksār

bole niyyat das pe kī thī lījiye banda-navāz

kāmyābī kī duā farmā.iye ba.ad-az-namāz

is jagah se uTh ke ghar par ek sāhab ke liye

das baras nākām rahne par hue the jo b a

railway meñ the mulāzim ḳhud bhī the chalte hue

aap kī tanḳhvāh to kam ThāTh the lekin baḌe

english style pe rahne kā jo un ko shauq thā

boot batri paañv kī collar gale kā tauq thā

phuus ke chhappar meñ rahte the ye is sāmān se

aur furniture to ḳhārij un ke thā imkān se

TuuTī phūTī kursiyāñ le kar kisī dūkān se

baiThte the un pe chhappar meñ nihāyat shaan se

naam ik taḳhtī pe likh rakhā thā yuuñ bahr-e-vaqār

mister abrāhām b-a T T c e aa.ī aar

dekh kar sūrat ko un kī is tarah kahne lage

aa.ī aim very busy make heast jaldī boliye

phir udhar Tahle idhar Tahle ghaḌī ko dekh kar

apne kutte se kahā kam suun un se go away

phir kahāñ u aar candidate baT no bold man

tum ko apnī vote kaise degā sāhab old man

chūñki candidate añgrezī samajhte hī na the

giḌgiḌā kar is tarah sāhab se farmāne lage

ye to mumkin hī nahīñ hai aap paidal jā.iye

maiñ ne motor maañg lī hai aap hī ke vāste

aur kyūñkar is tarah chaliyegā mujh ko dene vote

kiije pocket book pe tārīḳh-e-election jald note

baat añgrezī-numā urdu meñ yuuñ sāhab ne kī

ham kahā english meñ Tum samjhā nahīñ o aa.ī c

dekho apnī vote rakhnī māñTgā hai ham frē

kis ko degā pahle baTlāne nahīñ sakTā koī

ham city father nahīñ tum ko banānā māñgTā

D.m. phir motor pe ham kaahe ko jaanā māñgTā

ho ke jab māyūs ye palTe vahāñ se muñh banā.e

dil meñ kahte the ki in kā vote to jaanā hai haa.e

saal bhar pahle baḌe din meñ jo Daalī de to paa.e

ab ba-juz is ke koī sūrat nahīñ bantī banā.e

fees de kar nurse ik bahr-e-sifārish lā.ūñgā

chal gayā chakma to un se vote phir le jā.ūñgā

phir baḌhe aage yahāñ se vote ke armān meñ

ghus paḌe ye ek buz qassāb kī dūkān meñ

nasr meñ paḌh kar qasīda pahle us kī shaan meñ

chāhte the ye kahīñ kuchh shaiḳh jī ke kaan meñ

yuuñ kanautī ko badal kar shaiḳh sāhab ne kahā

suniye hajrat ham lagī lipTī nahīñ rakhte jarā

chaudharī ne kal kahā thā ham se ai bhayyā sukūr

siikh munne jis ko kah deñ boot de denā jarūr

par manāhī kar ga.e jab maulbī abdul gafūr

rafjī ko bote de sakte nahīñ ham to hujūr

sunte haiñ kurān meñ farmā ga.e the khud rasūl

diin kī jab baat Thahrī dakhl denā be fajūl

vaañ kutub-ud-dīn bhī kahte the sachchī hai ye baat

gair majhab vaale ko lambar banānā bā-hiyāt

siikh jī majhab tumhārā aur un kī aur jaat

ho ke lambar vo khudā jaane kareñ kiyā vārdāt

haañ koī majhab kā apne ho to is ko bote do

jab tumheñ maukā mile aisoñ ko bhayyā choT do

in ko buz qassāb ne jab de diyā rūkhā javāb

ye uThe dūkān se māyūs bā-chashm-e-pur-āb

apne worker se kahā jā kar ki suniye to janāb

aap hī tadbīr ab kuchh kījiye us kī shitāb

sarf kī parvā nahīñ jo ho munāsib kījiye

shaiḳh jī ke vote ko lekin na jaane dījiye

dil meñ worker ḳhush hue kahne lage bā-sad surūr

is taraf se aap bilkul mutma.in rahiye huzūr

aur logoñ se zyāda sarf to hogā zarūr

to sahī jab aap hī ko vote deñ abdushshukūr

piir louTan shaah kī ḳhidmat meñ jaatā huuñ abhī

hukm un kā shaiḳh jī ke paas laatā huuñ abhī

piir loTan shaah the ik ḳhāndānī takiya-dār

aañkh meñ surma ka.ī rattī gale meñ chand haar

rīsh-e-aqdas paan ke dhabboñ se rashk-e-lāla zaar

gerua kurtā gale meñ haath meñ ik pusht ḳhaar

zard tahmad paañv meñ lakḌī kī ūñchī c khaḌā.ūñ

ghūmte phirte the yūñhī shahr shahr aur gaañv gaañv

pahuñche worker un kī ḳhidmat meñ ba-tājīl-e-tamām

do rūpa.e nazrāne ke de kar kiyā jhuk kar salām

arz kī haiñ aap to hājat ravā-e-ḳhās-o-ām

shaiḳh jī kā vote dilvā dījiye bas hai ye kaam

chūñki hazrat kī haiñ bai.at meñ miyāñ abdushshukūr

aap farmā deñ agar tū vote de deñge zarūr

aap kī dāvat kā kal ghar par karūñgā intizām

shaiḳh jī ko bhī bulā lūñgā vahīñ par vaqt-e-shām

tazkire meñ vote kā chheḌūñgā mābain-e-ta.ām

aap un ko hukm de deñ ge to ho jā.egā kaam

bole loTan shaah baabā ḳhush raho dāvat qubūl

ham faqīroñ kī duā se hogā sab matlab husūl

muḳhtasar se ibtidā.ī vāqiye jo kuchh likhe

kyā ajab kaafī hoñ ye public kī ibrat ke liye

is tarah ke voter aur member huuñ jab is qism ke

kahiye is municipality se kise rāhat mile

sākinān-e-shahr ab hoshyār honā chāhiye

member aur voter kā kuchh me.aar honā chāhiye

ḳhatm bhī kar do 'zarīf' ab tum bayān-e-membarī

tā-ba-kai āḳhir rahoge qissa-ḳhvān-e-memberī

ḳhvāb se chauñkeñ zarā jab sar-girān-e-membarī

phir sunā denā unheñ tum dāstān-e-membarī

ab samand-e-fikr kī baag aur jānib moḌ do

sone vaale so ga.e qissa adhūrā chhoḌ do

wah bi municipality jaan kya kahna tera

tu chachi laila ki aashiq tera majnun ka chacha

apni KHuddari ko kho kar tujh pe jo shaida hua

be-KHudi mein ye zaban-e-haal se kahte suna

bas-ki diwana shudam aql-e-rasa darkar nist

aashiq-e-municipality rahiya darkar nist

tera KHwahish-mand har qaid-e-liyaqat se bari

jis ka ji chahe laDe aur laD ke le le membari

ahd-e-azadi ne aisi Dal di hai abtari

ab to har tanis aur tazkir mein hai hamsari

tujh ko kya ranDi hai koi ya ki ranDi-baz hai

tera darwaza kas-o-na-kas ke upar baz hai

jama kar de qarz hi le kar zamanat ke pachas

dur hoti jae ghairat jab election aae pas

wotaron ke hath joDe KHub ho kar bad-hawas

giDgiDa kar har kas-o-na-kas se ho ye iltimas

rehn parche ke ewaz izzat meri kar lijiye

apne bachchon ka tasadduq wote mujh ko dijiye

suniye ek sahab ka qissa jab hui shamat sawar

ye zamanat kar ke daKHil ban gae ummid-war

chhoD pesha tark farmaya jo kuchh tha karobar

kuchh asas-ul-bait becha kuchh liya sudi udhaar

muztarib rahte the ye nam-awari ke waste

ghar se nikle wote lene membari ke waste

sab se pahle un ko jis woter ke ghar jaana paDa

shaiKH buddhu nam tha aur tha julaha qaum ka

dhoti bandhe marzai pahne tana baiTha hua

ek saDi miTTi ka huqqa pi raha tha kaj-ada

jate hi taslim ki jab is ko ba-sad-ehtiram

munh ko TeDha kar ke bola ko hai baalekum-salam

bole ye pahle na aaya main hua itna qusur

shaiKH buddhu aap mujh par rahm farmaen huzur

aap ko walid kaha karte the bhai ab se dur

main bhatija aap ka hun wote le lunga zarur

bole buddhu ka kahiyo hum kehka kehka boTe dei

boTe pahiye u jo tirte hamka das ka note dei

jab surtedar bola lae ho kauno gawah

hum kaha sasura jamadarwa kihis hum ka tabah

hum julaha aap ke aur aap Thahre baadshah

kaun kah ke samne mutat hai sahab wah wah

hans ke kah denen mujhaD sikh ji jao bari

rah gai munh hae ke sab lambaran ki lambari

sun liyo sari katha diho ki nahin ye batao

bote mange aae ho hum se to hum ka kuchh dilao

kar chikan bakwas ab bhayya na hamra muD khao

kah diya bas kah diya ab jao chuppe ghar ka jao

jo rakam tum se kaha sab peshgi le leb hum

boot de motor pe le jahiyo to han de deb hum

jab miyan buddhu ke tewar is qadar dekhe kaDe

dahne baen dekh jhaT qadmon pe is ke gir paDe

dil mein pachhtae ki aaKHir kyun hue the hum khaDe

kahiye aise jahilon se kya koi kushti laDe

aabru ke sath de kar panch raazi kar liya

kaamyabi par hue KHush tao monchhon par diya

aage baDh kar ek hazrat ka hua phir samna

un se ja kar is tarah ki arz ba-sad-iltija

banda parwar ek mazhab hai hamara aap ka

wote dijega jo mujh ko aap KHush hoga KHuda

hain mere halqe mein jo jo mere mazhab ke KHilaf

dekhiye member zara ho lun to kar dun sab ko saf

mehtaran ke dar pe jhaDu dene aae kya majal

aur saqqa mushk se nali dhulae kya majal

tex ghar-ware ka un par bandh na jae kya majal

le len bamba ghar mein be meter lagae kya majal

nach tigni ka inhen ab main nachaunga huzur

dekhe kis kis tarah un ko sataunga huzur

KHush hue sun kar janab-e-maulwi-e-maktabi

hath phera rish par aur is tarah taqrir ki

aap is ke ahal hain meri nazar mein waqai

zat-e-sami ko samajhta hun main faKHr-e-membari

mohtaram main wade qabl-az-waqt kar sakta nahin

farz hai ifa-e-wada phir mukar sakta nahin

is mein ek ishkal-e-sharai aur bhi hai kya kahun

mein ianat aap ki bil-farz qirtasan karun

rae to apni hiba kar dun ewaz kuchh bhi na lun

kyun badal zaea karun kis waste musrif banun

jaanta hun ye ki meri rae hai kitni waqia

muft zaea kyun karun jab main nahin hu mustatia

hasb-e-KHwahish gar badal mujh ko ata kar den janab

kya ajab pesh-e-KHuda majur bhi hun aur masab

main ne dikhla di hudud-e-shara mein rah-e-sawab

mere maruzat ko farmaiye gar mustajab

rae de dene mein ahqar ko tammul kuchh na ho

KHud karun tajil hatman phir tasahul kuchh na ho

rae de dunga ewaz main aap ko KHamsin ke

itne hi milte hain mujh ko waz ke talqin ke

hazrat-e-wala to KHud paband hain aain ke

is se kam dena muradif hai meri tauhin ke

han ye mumkin hai ki kuchh taqlil farma dijiye

hai ye kar-e-KHair ab tajil farma dijiye

KHullas-e-ahbab se kyun istishaara kijiye

raaz poshida rahe kyun aashkara kijiye

sab se achchha hai zara zahmat gawara kijiye

lijiye tasbih mujh se istiKHara kijiye

arz ki hai main ne jo itni raqam par dekhiye

mana jab aae to phir kuchh is se kam par dekhiye

ye nihayat kaen the dil mein ye bole soch ke

shakl to achchhi hai par zeba nahin mere liye

istiKHara main karun kya aap ke hote hue

karta hun niyyat to main aap istiKHara kijiye

niyyat un ke dil mein thi tasbih un ke hath mein

chuha apni ghat mein tha billi apni ghat mein

mana aaya istiKHara chhuTte hi pahli bar

maulwi sahab ke chehre par hua kuchh antr-jar

phir jo dekha wajib aaya ho be-iKHtiyar

puchha niyyat kis qadar par ki thi bahr-e-KHaksar

bole niyyat das pe ki thi lijiye banda-nawaz

kaamyabi ki dua farmaiye baad-az-namaz

is jagah se uTh ke ghar par ek sahab ke liye

das baras nakaam rahne par hue the jo b a

railway mein the mulazim KHud bhi the chalte hue

aap ki tanKHwah to kam ThaTh the lekin baDe

english style pe rahne ka jo un ko shauq tha

boot batri panw ki collar gale ka tauq tha

phus ke chhappar mein rahte the ye is saman se

aur furniture to KHarij un ke tha imkan se

TuTi phuTi kursiyan le kar kisi dukan se

baiThte the un pe chhappar mein nihayat shan se

nam ek taKHti pe likh rakha tha yun bahr-e-waqar

mister abraham b-a T T c e aai aar

dekh kar surat ko un ki is tarah kahne lage

aai aim wery busy make heast jaldi boliye

phir udhar Tahle idhar Tahle ghaDi ko dekh kar

apne kutte se kaha kam sun un se go away

phir kahan u aar candidate baT no bold man

tum ko apni wote kaise dega sahab old man

chunki candidate angrezi samajhte hi na the

giDgiDa kar is tarah sahab se farmane lage

ye to mumkin hi nahin hai aap paidal jaiye

main ne motor mang li hai aap hi ke waste

aur kyunkar is tarah chaliyega mujh ko dene wote

kije pocket book pe tariKH-e-election jald note

baat angrezi-numa urdu mein yun sahab ne ki

hum kaha english mein Tum samjha nahin o aai c

dekho apni wote rakhni manTga hai hum free

kis ko dega pahle baTlane nahin sakTa koi

hum city father nahin tum ko banana mangTa

Dm phir motor pe hum kahe ko jaana mangTa

ho ke jab mayus ye palTe wahan se munh banae

dil mein kahte the ki in ka wote to jaana hai hae

sal bhar pahle baDe din mein jo Dali de to pae

ab ba-juz is ke koi surat nahin banti banae

fees de kar nurse ek bahr-e-sifarish launga

chal gaya chakma to un se wote phir le jaunga

phir baDhe aage yahan se wote ke arman mein

ghus paDe ye ek buz qassab ki dukan mein

nasr mein paDh kar qasida pahle us ki shan mein

chahte the ye kahin kuchh shaiKH ji ke kan mein

yun kanauti ko badal kar shaiKH sahab ne kaha

suniye hajrat hum lagi lipTi nahin rakhte jara

chaudhari ne kal kaha tha hum se ai bhayya sukur

sikh munne jis ko kah den boot de dena jarur

par manahi kar gae jab maulbi abdul gafur

rafji ko bote de sakte nahin hum to hujur

sunte hain kuran mein farma gae the khud rasul

din ki jab baat Thahri dakhl dena be fajul

wan kutub-ud-din bhi kahte the sachchi hai ye baat

gair majhab wale ko lambar banana ba-hiyat

sikh ji majhab tumhaara aur un ki aur jat

ho ke lambar wo khuda jaane karen kiya wardat

han koi majhab ka apne ho to is ko bote do

jab tumhein mauka mile aison ko bhayya choT do

in ko buz qassab ne jab de diya rukha jawab

ye uThe dukan se mayus ba-chashm-e-pur-ab

apne worker se kaha ja kar ki suniye to janab

aap hi tadbir ab kuchh kijiye us ki shitab

sarf ki parwa nahin jo ho munasib kijiye

shaiKH ji ke wote ko lekin na jaane dijiye

dil mein worker KHush hue kahne lage ba-sad surur

is taraf se aap bilkul mutmain rahiye huzur

aur logon se zyaada sarf to hoga zarur

to sahi jab aap hi ko wote den abdushshukur

pir louTan shah ki KHidmat mein jata hun abhi

hukm un ka shaiKH ji ke pas lata hun abhi

pir loTan shah the ek KHandani takiya-dar

aankh mein surma kai ratti gale mein chand haar

rish-e-aqdas pan ke dhabbon se rashk-e-lala zar

gerua kurta gale mein hath mein ek pusht KHar

zard tahmad panw mein lakDi ki unchi c khaDaun

ghumte phirte the yunhi shahr shahr aur ganw ganw

pahunche worker un ki KHidmat mein ba-tajil-e-tamam

do rupae nazrane ke de kar kiya jhuk kar salam

arz ki hain aap to hajat rawa-e-KHas-o-am

shaiKH ji ka wote dilwa dijiye bas hai ye kaam

chunki hazrat ki hain baiat mein miyan abdushshukur

aap farma den agar tu wote de denge zarur

aap ki dawat ka kal ghar par karunga intizam

shaiKH ji ko bhi bula lunga wahin par waqt-e-sham

tazkire mein wote ka chheDunga mabain-e-taam

aap un ko hukm de den ge to ho jaega kaam

bole loTan shah baba KHush raho dawat qubul

hum faqiron ki dua se hoga sab matlab husul

muKHtasar se ibtidai waqiye jo kuchh likhe

kya ajab kafi hon ye public ki ibrat ke liye

is tarah ke woter aur member hun jab is qism ke

kahiye is municipality se kise rahat mile

sakinan-e-shahr ab hoshyar hona chahiye

member aur woter ka kuchh mear hona chahiye

KHatm bhi kar do 'zarif' ab tum bayan-e-membari

ta-ba-kai aaKHir rahoge qissa-KHwan-e-memberi

KHwab se chaunken zara jab sar-giran-e-membari

phir suna dena unhen tum dastan-e-membari

ab samand-e-fikr ki bag aur jaanib moD do

sone wale so gae qissa adhura chhoD do