shauhar ki fariyaad

ham apne kamre meñ be-monis-o-be-yār baiThe haiñ

ki drawing-rōm meñ biivī ke rishta-dār baiThe haiñ

yahāñ ham baiTh kar chaa.e ke ik cup ko taraste haiñ

vahāñ sab le ke biscuit cake ke ambār baiThe haiñ

hamārā bas chale to sab ko hī kuchlā khilā deñ ham

magar qānūn se Darte haiñ aur lāchār baiThe haiñ

na chheḌo ham ko ai biibī paḌosan ta.ane de de kar

''tumheñ aThkheliyāñ sūjhī haiñ ham bezār baiThe haiñ''

mire saale ne pūchhā dūlhā bhaa.ī haiñ kahāñ baajī

to vo bolīñ yahīñ par haiñ magar be kaar baiThe haiñ

hamārī billī aur ham se hī myā.ūñ haa.e rī qismat

magar ham kyā kareñ ki qaul apnā haar baiThe haiñ

sabhī shādī-shuda haiñ ġham zada aur ab ye hālat hai

musībat ghar meñ hai aur ḳhud saḌak ke paar baiThe haiñ

zarā jā kar miyāñ hammād-hasan ko bhī tasallī do

ki hazrat shādī kar baiThe haiñ aur be zaar baiThe haiñ

hum apne kamre mein be-monis-o-be-yar baiThe hain

ki drawing-room mein biwi ke rishta-dar baiThe hain

yahan hum baiTh kar chae ke ek cup ko taraste hain

wahan sab le ke biscuit cake ke ambar baiThe hain

hamara bas chale to sab ko hi kuchla khila den hum

magar qanun se Darte hain aur lachaar baiThe hain

na chheDo hum ko ai bibi paDosan tane de de kar

tumhen aThkheliyan sujhi hain hum bezar baiThe hain

mere sale ne puchha dulha bhai hain kahan baji

to wo bolin yahin par hain magar be kar baiThe hain

hamari billi aur hum se hi myaun hae ri qismat

magar hum kya karen ki qaul apna haar baiThe hain

sabhi shadi-shuda hain gham zada aur ab ye haalat hai

musibat ghar mein hai aur KHud saDak ke par baiThe hain

zara ja kar miyan hammad-hasan ko bhi tasalli do

ki hazrat shadi kar baiThe hain aur be zar baiThe hain