abe sale teri mahfil ka naqsha aur hi kuchh hai

abe saale tirī mahfil kā naqsha aur hī kuchh hai

vo duniyā aur hī kuchh hai ye duniyā aur hī kuchh hai

shab-e-va.ada mujhe bahlā rahe ho bosa de de kar

idhar aao ajī merī tamanna aur hī kuchh hai

adū thāne maiñ baiThā vo shifā-ḳhāne meñ leTe haiñ

mirī dānist meñ ye to aḌañgā aur hī kuchh hai

muḳhālif party pichhle mazāmīnoñ ko rotī hai

hamārī shā.erī kī aaj duniyā aur hī kuchh hai

adū ke saath tum jaate ho agar cinemāoñ meñ

ḳhabar bhī hai tumheñ us kā irāda aur hī kuchh hai

na maiñ bosoñ se raazī huuñ na raazī huuñ lipaTne se

tire sar kī qasam merī tamanna aur hī kuchh hai

jo tum kahte ho dushman ko police vāloñ se piTvā do

zarā Thahro abhī merā irāda aur hī kuchh hai

abe chāragaroñ kyā fā.eda hogā davāoñ se

mire dard-e-mohabbat kā mudāvā aur hī kuchh hai

vo pankhā jhal rahe haiñ aur adū soyā hai ḳhalvat meñ

samajh meñ aa gayā ab to ye ragḌā aur hī kuchh hai

gale meñ pā.ejāma sar pe juute paañv meñ Topī

janāb-e-'būm' kā vahshat meñ naqsha aur hī kuchh hai

abe sale teri mahfil ka naqsha aur hi kuchh hai

wo duniya aur hi kuchh hai ye duniya aur hi kuchh hai

shab-e-wada mujhe bahla rahe ho bosa de de kar

idhar aao aji meri tamanna aur hi kuchh hai

adu thane main baiTha wo shifa-KHane mein leTe hain

meri danist mein ye to aDanga aur hi kuchh hai

muKHalif party pichhle mazaminon ko roti hai

hamari shaeri ki aaj duniya aur hi kuchh hai

adu ke sath tum jate ho agar cinemaon mein

KHabar bhi hai tumhein us ka irada aur hi kuchh hai

na main boson se raazi hun na raazi hun lipaTne se

tere sar ki qasam meri tamanna aur hi kuchh hai

jo tum kahte ho dushman ko police walon se piTwa do

zara Thahro abhi mera irada aur hi kuchh hai

abe chaaragaron kya faeda hoga dawaon se

mere dard-e-mohabbat ka mudawa aur hi kuchh hai

wo pankha jhal rahe hain aur adu soya hai KHalwat mein

samajh mein aa gaya ab to ye ragDa aur hi kuchh hai

gale mein paejama sar pe jute panw mein Topi

janab-e-'bum' ka wahshat mein naqsha aur hi kuchh hai