baghicha-e-atfal hai kuTiya mere aage

bāġhīcha-e-atfāl hai kuTiyā mire aage

gorā mire pīchhe hai to kaalā mire aage

is daur meñ jhūToñ hī kī hotī hai ḳhushāmad

leader ko burā kyoñ kaho achchhā mire aage

aayā huuñ jo dubai se to ye chaav haiñ mere

saalī mire pīchhe hai to saalā mire aage

schōl kī ta.alīm ne gul aisā khilāyā

ab āñkheñ dikhātā hai bhatījā mire aage

laayā thā bhagā kar mujhe le bhāgī vo ghar se

jo maiñ ne kiyā thā vahī aayā mire aage

aġhyār hasīñ hoñ to maiñ huuñ un kā bhī āshiq

yaksāñ hai har ik apnā parāyā mire aage

qismat ko na kos apnī 'rahīm' itnā samajh le

auroñ se kiyā maiñ ne jo aayā mire aage

baghicha-e-atfal hai kuTiya mere aage

gora mere pichhe hai to kala mere aage

is daur mein jhuTon hi ki hoti hai KHushamad

leader ko bura kyon kaho achchha mere aage

aaya hun jo dubai se to ye chaw hain mere

sali mere pichhe hai to sala mere aage

school ki talim ne gul aisa khilaya

ab aankhen dikhata hai bhatija mere aage

laya tha bhaga kar mujhe le bhagi wo ghar se

jo main ne kiya tha wahi aaya mere aage

aghyar hasin hon to main hun un ka bhi aashiq

yaksan hai har ek apna paraya mere aage

qismat ko na kos apni 'rahim' itna samajh le

auron se kiya main ne jo aaya mere aage