haram mein wo nahin lutf jo halal mein hai

harām meñ vo nahīñ lutf jo halāl meñ hai

ki murġh-o-māhī kī lazzat hamārī daal meñ hai

fasād jo bhī karātā hai firqā-vārāna

vo bheḌiyā hai magar aadmī kī khaal meñ hai

hai iḳhtiyār ḳhayāloñ meñ chāhe jo bhī kareñ

mazā jo hijr meñ hai vo kahāñ visāl meñ hai

mizāh-o-tanz kā me.aar hai bahut ūñchā

hai zehn-o-fikr kī pastī jo ibtidāl meñ hai

na jaane ye mirā ghar hai ki ġham-kada koī

maiñ ranj meñ huuñ mirī ahliya malāl meñ hai

zamāna chāñd sitāroñ se mutma.in hī nahīñ

hamārī shā.irī aTkī huī jamāl meñ hai

ġharībī kaise haTegī batāo netāo

ġharīb uljhā huā bas isī savāl meñ hai

kalāl luTTī kā qaa.il hai jaam kā saaqī

ye farq zarf kā saaqī meñ aur kalāl meñ hai

nahīñ hai bahr meñ be-vazn hai 'rahīm' magar

hamārī shā.irī sur meñ hai aur taal meñ hai

haram mein wo nahin lutf jo halal mein hai

ki murgh-o-mahi ki lazzat hamari dal mein hai

fasad jo bhi karaata hai firqa-warana

wo bheDiya hai magar aadmi ki khaal mein hai

hai iKHtiyar KHayalon mein chahe jo bhi karen

maza jo hijr mein hai wo kahan visal mein hai

mizah-o-tanz ka mear hai bahut uncha

hai zehn-o-fikr ki pasti jo ibtidal mein hai

na jaane ye mera ghar hai ki gham-kada koi

main ranj mein hun meri ahliya malal mein hai

zamana chand sitaron se mutmain hi nahin

hamari shairi aTki hui jamal mein hai

gharibi kaise haTegi batao netao

gharib uljha hua bas isi sawal mein hai

kalal luTTi ka qail hai jam ka saqi

ye farq zarf ka saqi mein aur kalal mein hai

nahin hai bahr mein be-wazn hai 'rahim' magar

hamari shairi sur mein hai aur tal mein hai