jashn-e-masarrat

hamāre saath vaale ghar meñ lagtā hai divālī hai

dar-o-dīvār par hai rang-o-ārā.ish misālī hai

lagā hai bāġhbāñ bhī rāt-din is kī sajāvaT meñ

na.e paude lage mahkī huī phūloñ kī Daalī hai

hai mehmānoñ se raunaq kis qadar in ke yahāñ dekho

ye ḳhāla haiñ vo ḳhālū haiñ ye saalā hai vo saalī hai

koī ghar meñ hī ghanToñ se lagī hai aaj make-up meñ

to koī parlour meñ dopahar se yarġhamālī hai

azīz-o-rishta-dār aa.e hue haiñ duur se saare

samundar paar kar ke saas bhī aane hī vaalī hai

bahut masrūr-o-shādāñ hai udhar jis par nazar Daalo

chamak āñkhoñ meñ sab ke aur sab gāloñ pe laalī hai

emergency meñ lady doctor aur nurse hāzir haiñ

khaḌī hai ambulance jis par lagā parcham hilālī hai

kitchen se aa rahī hai ishtihā-āmez jo ḳhushbū

abhī thāloñ meñ bāvarchī ne biryānī nikālī hai

hameñ dāvat nahīñ bhejī magar khānā to bhejeñge

so ham ne bhī idhar apnī rakābī dho ke Daalī hai

magar ye mājrā kyā hai jo pūchhā ham ne begam se

to bolīñ jheñp kar vo baat kyā is meñ nirālī hai

chhalāñgeñ mārtī phirtī thī jo kal tak mohalle meñ

kahā karte the tum lagtā hai ye shaitāñ kī saalī hai

baḌe nāz-o-ni.am se jis ko paalā hai paḌosan ne

usī naT-khaT sī billī ke vilādat hone vaalī hai

hamare sath wale ghar mein lagta hai diwali hai

dar-o-diwar par hai rang-o-araish misali hai

laga hai baghban bhi raat-din is ki sajawaT mein

nae paude lage mahki hui phulon ki Dali hai

hai mehmanon se raunaq kis qadar in ke yahan dekho

ye KHala hain wo KHalu hain ye sala hai wo sali hai

koi ghar mein hi ghanTon se lagi hai aaj make-up mein

to koi parlour mein dopahar se yarghamali hai

aziz-o-rishta-dar aae hue hain dur se sare

samundar par kar ke sas bhi aane hi wali hai

bahut masrur-o-shadan hai udhar jis par nazar Dalo

chamak aankhon mein sab ke aur sab galon pe lali hai

emergency mein lady doctor aur nurse hazir hain

khaDi hai ambulance jis par laga parcham hilali hai

kitchen se aa rahi hai ishtiha-amez jo KHushbu

abhi thaalon mein bawarchi ne biryani nikali hai

hamein dawat nahin bheji magar khana to bhejenge

so hum ne bhi idhar apni rakabi dho ke Dali hai

magar ye majra kya hai jo puchha hum ne begam se

to bolin jhenp kar wo baat kya is mein nirali hai

chhalangen marti phirti thi jo kal tak mohalle mein

kaha karte the tum lagta hai ye shaitan ki sali hai

baDe naz-o-niam se jis ko pala hai paDosan ne

usi naT-khaT si billi ke wiladat hone wali hai