shair ka laKHt-e-jigar

mere ghar meñ tū jo ai nūr-e-nazar paidā huā

ḳhush-nasībī hai tirī shā.ir ke ghar paidā huā

terī bahneñ aur bhaa.ī sab ke sab haiñ nā-bakār

ek lashkar go ki tujh se peshtar paidā huā

zauq-e-sher-o-shā.irī bilkul kisī meñ bhī nahīñ

in meñ se har ek bas jaise sifar paidā huā

baap ke naqsh-e-qadam par tū chalegā hai yaqīñ

mere jaisā dīda-var bār-e-digar paidā huā

log terī shā.irī sun kar kaheñge barmalā

'mīr' phir paidā huā hai phir 'jigar' paidā huā

chāhte to the mire aġhyār tū paidā na ho

phir bhī ye himmat hai terī tū agar paidā huā

maiñ baḌā hairān thā aur sochtā thā baar baar

kis tarah ye sāhab-e-ilm-o-hunar paidā huā

āḳhirash uqda ye kholā maañ ne terī ek din

kyā jatan karne pe ye jān-e-pidar paidā huā

pī ga.ī thī ghol kar 'āzād' kī āb-e-hayāt

tab kahīñ ghar meñ mire tujh sā pisar paidā huā

mere ghar mein tu jo ai nur-e-nazar paida hua

KHush-nasibi hai teri shair ke ghar paida hua

teri bahnen aur bhai sab ke sab hain na-bakar

ek lashkar go ki tujh se peshtar paida hua

zauq-e-sher-o-shairi bilkul kisi mein bhi nahin

in mein se har ek bas jaise sifar paida hua

bap ke naqsh-e-qadam par tu chalega hai yaqin

mere jaisa dida-war bar-e-digar paida hua

log teri shairi sun kar kahenge barmala

'mir' phir paida hua hai phir 'jigar' paida hua

chahte to the mere aghyar tu paida na ho

phir bhi ye himmat hai teri tu agar paida hua

main baDa hairan tha aur sochta tha bar bar

kis tarah ye sahab-e-ilm-o-hunar paida hua

aaKHirash uqda ye khola man ne teri ek din

kya jatan karne pe ye jaan-e-pidar paida hua

pi gai thi ghol kar 'azad' ki aab-e-hayat

tab kahin ghar mein mere tujh sa pisar paida hua