tumhaare jamparon par saDiyon par aur ghararon par

tumhāre jamparoñ par sāḌiyoñ par aur ġharāroñ par

luTe jaate haiñ dil vaale ka.ī salma-sitāroñ par

election ab bhalā kaise laḌeñge ham raqīboñ se

kamā.ī to uḌā Daalī hai saarī ishtihāroñ par

phisal kar rah ga.e haiñ nā-gahāñ kele ke chhilke se

kamandeñ Dālne ghar se chale the chāñd tāroñ par

burā añgrez ko kahtā huuñ piTtā huuñ clerkoñ se

gad.he se gir ke ġhussa aa hī jaatā hai kumhāroñ par

baḌe hī karr-o-farr se piiTh par kachhve kī baiThe haiñ

yūñhī ham reñgte pahuñcheñge āḳhir kohsāroñ par

miThā.ī baañT dī hai dushmanoñ meñ us ne shādī kī

magar Tarḳhā diyā hai ham ġharīboñ ko chhohāroñ par

yahī 'arshad' hamāre nau-javānoñ kī kahānī hai

jiye daulat kī ḳhātir aur mare filmī-sitāroñ par

tumhaare jamparon par saDiyon par aur ghararon par

luTe jate hain dil wale kai salma-sitaron par

election ab bhala kaise laDenge hum raqibon se

kamai to uDa Dali hai sari ishtihaaron par

phisal kar rah gae hain na-gahan kele ke chhilke se

kamanden Dalne ghar se chale the chand taron par

bura angrez ko kahta hun piTta hun clerkon se

gadhe se gir ke ghussa aa hi jata hai kumhaaron par

baDe hi karr-o-farr se piTh par kachhwe ki baiThe hain

yunhi hum rengte pahunchenge aaKHir kohsaron par

miThai banT di hai dushmanon mein us ne shadi ki

magar TarKHa diya hai hum gharibon ko chhohaaron par

yahi 'arshad' hamare nau-jawanon ki kahani hai

jiye daulat ki KHatir aur mare filmi-sitaron par