ulTi ganga

vo daur aane vaalā hai begam ne ye kahā

kar deñgī band aurteñ mardoñ kā nātiqa

ab vo zamāna aa.egā mahvash kamā.eñge

aur mard ghar pe baiTh ke khānā pakā.eñge

tum merā ghar pe baiTh ke dekhoge rāsta

ab tum mire huzūr meñ lāoge nāshta

had se burā huzūr kā anjām hovegā

mardoñ se guftugū kā ġhazal naam hovegā

būḌhe ko sola saal kī dulhan pasand hai

mardoñ ko saarī nasl corruption pasand hai

ham log baḌh rahe haiñ taraqqī kī raah meñ

sar meñ dimāġh rakhte haiñ duniyā nigāh meñ

lady police vaalī hai lady hai fauj meñ

kitne sudhār aa.e haiñ aurat kī nauj meñ

luñgī se Dhāñp Dhāñp ke muñh apnā ro.eñge

aurat jahāñ jahāñ thī vahāñ mard ho.eñge

ham ne kahā ki is meñ nahīñ hai muzā.iqa

ham bhī badal ke dekheñge ab muñh kā zā.iqa

ab laḌkiyoñ pe barq-e-tabassum girā.eñge

ab laḌke apne husn kā jalva dikhā.eñge

kitnī musībatoñ se milegī hameñ najāt

so.egā laḌkā jāgegī laḌkī tamām raat

aa.egā ab na sūrat-e-āshiq pe rañg-e-yās

ab phuul uḌ ke ā.eñge bhañvre ke ās-pās

socheñge pahroñ baiTh ke qānūn-e-mahvashāñ

ab rape kī report likhā.eñge naujavāñ

dīvāngī meñ chaak garebāñ kiye hue

lailā milegī baal pareshāñ kiye hue

niklegī shīrīñ haath meñ tesha liye hue

farhād hogā peT meñ bachcha liye hue

majnūñ ko mahmaloñ meñ biThā.eñ to ḳhuub hai

lailā.eñ zauq-e-qais dikhā.eñ to ḳhuub hai

wo daur aane wala hai begam ne ye kaha

kar dengi band aurten mardon ka natiqa

ab wo zamana aaega mahwash kamaenge

aur mard ghar pe baiTh ke khana pakaenge

tum mera ghar pe baiTh ke dekhoge rasta

ab tum mere huzur mein laoge nashta

had se bura huzur ka anjam howega

mardon se guftugu ka ghazal nam howega

buDhe ko sola sal ki dulhan pasand hai

mardon ko sari nasl corruption pasand hai

hum log baDh rahe hain taraqqi ki rah mein

sar mein dimagh rakhte hain duniya nigah mein

lady police wali hai lady hai fauj mein

kitne sudhaar aae hain aurat ki nauj mein

lungi se Dhanp Dhanp ke munh apna roenge

aurat jahan jahan thi wahan mard hoenge

hum ne kaha ki is mein nahin hai muzaiqa

hum bhi badal ke dekhenge ab munh ka zaiqa

ab laDkiyon pe barq-e-tabassum giraenge

ab laDke apne husn ka jalwa dikhaenge

kitni musibaton se milegi hamein najat

soega laDka jagegi laDki tamam raat

aaega ab na surat-e-ashiq pe rang-e-yas

ab phul uD ke aaenge bhanwre ke aas-pas

sochenge pahron baiTh ke qanun-e-mahwashan

ab rape ki report likhaenge naujawan

diwangi mein chaak gareban kiye hue

laila milegi baal pareshan kiye hue

niklegi shirin hath mein tesha liye hue

farhad hoga peT mein bachcha liye hue

majnun ko mahmalon mein biThaen to KHub hai

lailaen zauq-e-qais dikhaen to KHub hai