wapsi

ek din jab tañg mujh par ho ga.ī arz-e-dakan

tab muhājir ban ke niklā bāñdh kar sar se kafan

kitne hī barsoñ azāb-e-ajnabiyyat bhī sahā

zehn-o-dil par jheltā hī rah gayā rañj-o-mehan

muflisī meñ bhī tavakkul par guzāra yuuñ kiyā

pairahan sabr-o-qanā.at kā rahā hai zeb-tan

ḳhaak chhānī dar-ba-dar kī Thokareñ khā.īñ bahut

par mujhe masrūf rakhtī thī sadā fikr-e-suḳhan

fikr-e-duniyā se bhī aksar mil hī jaatī thī najāt

fikr-e-uqbā meñ jo rahtā maiñ ibādat meñ magan

haath meñ dhāgā thā chhoTā aur suuī thī baḌī

maiñ rafū bhī kar nahīñ saktā thā apnā pairahan

dekh kar mashq-e-suḳhan merī suḳhan-fahmoñ ne jab

kar liyā mujh be-vatan ko bhī sharīk-e-anjuman

phir to jaise rahmatoñ ke baab mujh par khul ga.e

phir mujhe miltī ga.ī har sher par dād-e-suḳhan

haisiyat se bhī ziyāda izzat-o-shohrat milī

rizq bhī baḳhshā ḳhudā ne ba-tufail-e-ilm-o-fan

ab sabhoñ ko ḳhush-o-ḳhurram aur hañstā dekhne

vaqf maiñ ne kar diyā hai apnā tan man aur dhan

āḳhirat bhī bas isī tarah sañvar jaa.e mirī

is lagan meñ tā-dam-e-āḳhir rahūñgā maiñ magan

inkisārī se zamīñ ko dekh kar chaltā huuñ maiñ

maiñ ne badlā hai na badlūñgā kabhī apnā chalan

shā.irī kī har kajī DanDe se sīdhī ho ga.ī

zehn ko mere mo.attar kar gayā kevḌe kā ban

ghokaro ke chand kāñTe zehn meñ jab chubh ga.e

fikr ke sab aable phūTe to raas aa.ī chubhan

taaki merī shā.irī kī bhī zamīñ zarḳhez ho

dhumuḌī se bhī karūñgā iktisāb-e-fikr-o-fan

kuchh samajh meñ hī nahīñ aatā ki āḳhir kyā karūñ

is buḌhāpe meñ bhī mujh par haiñ fidā kuchh gul-badan

ai ḳhudā kar le qubūl ab 'ḳhvāh-maḳhvāh' kī ye duā

qā.em-o-dā.em rahe zinda-diloñ kī anjuman

god meñ apne sulāne ke liye hī 'ḳhvāh-maḳhvāh'

khīñch laa.ī hai merī miTTī mujhe apne vatan

ek din jab tang mujh par ho gai arz-e-dakan

tab muhajir ban ke nikla bandh kar sar se kafan

kitne hi barson azab-e-ajnabiyyat bhi saha

zehn-o-dil par jhelta hi rah gaya ranj-o-mehan

muflisi mein bhi tawakkul par guzara yun kiya

pairahan sabr-o-qanaat ka raha hai zeb-tan

KHak chhani dar-ba-dar ki Thokaren khain bahut

par mujhe masruf rakhti thi sada fikr-e-suKHan

fikr-e-duniya se bhi aksar mil hi jati thi najat

fikr-e-uqba mein jo rahta main ibaadat mein magan

hath mein dhaga tha chhoTa aur sui thi baDi

main rafu bhi kar nahin sakta tha apna pairahan

dekh kar mashq-e-suKHan meri suKHan-fahmon ne jab

kar liya mujh be-watan ko bhi sharik-e-anjuman

phir to jaise rahmaton ke bab mujh par khul gae

phir mujhe milti gai har sher par dad-e-suKHan

haisiyat se bhi ziyaada izzat-o-shohrat mili

rizq bhi baKHsha KHuda ne ba-tufail-e-ilm-o-fan

ab sabhon ko KHush-o-KHurram aur hansta dekhne

waqf main ne kar diya hai apna tan man aur dhan

aaKHirat bhi bas isi tarah sanwar jae meri

is lagan mein ta-dam-e-aKHir rahunga main magan

inkisari se zamin ko dekh kar chalta hun main

main ne badla hai na badlunga kabhi apna chalan

shairi ki har kaji DanDe se sidhi ho gai

zehn ko mere moattar kar gaya kewDe ka ban

ghokaro ke chand kanTe zehn mein jab chubh gae

fikr ke sab aable phuTe to ras aai chubhan

taki meri shairi ki bhi zamin zarKHez ho

dhumuDi se bhi karunga iktisab-e-fikr-o-fan

kuchh samajh mein hi nahin aata ki aaKHir kya karun

is buDhape mein bhi mujh par hain fida kuchh gul-badan

ai KHuda kar le qubul ab 'KHwah-maKHwah' ki ye dua

qaem-o-daem rahe zinda-dilon ki anjuman

god mein apne sulane ke liye hi 'KHwah-maKHwah'

khinch lai hai meri miTTi mujhe apne watan