ye teri zulf ka kunDal to mujhe mar chala

ye tirī zulf kā kunDal to mujhe maar chalā

jis pe qānūn bhī laagū ho vo hathiyār chalā

peT hī phuul gayā itne ḳhamīre khā kar

terī hikmat na chalī aur tirā bīmār chalā

bīviyāñ chaar haiñ aur phir bhī hasīnoñ se shaġhaf

bhaa.ī tū baiTh ke ārām se ghar-bār chalā

ujrat-e-ishq nahīñ detā na de bhaaḌ meñ jā

le tire daam se ab terā giraftār chalā

sansanī-ḳhez use aur koī shai na milī

merī tasvīr se vo shaam kā aḳhbār chalā

ye bhī achchhā hai ki sahrā meñ banāyā hai makāñ

ab kirā.e pe yahāñ sāya-e-dīvār chalā

ik adākār rukā hai to huā utnā hujūm!!

muḌ ke dekhā na kisī ne jo qalamkār chalā

chheḌ mahbūb se le Dūbegī kashtī 'jaidī'

aañkh se dekh use haath se patvār chalā

ye teri zulf ka kunDal to mujhe mar chala

jis pe qanun bhi lagu ho wo hathiyar chala

peT hi phul gaya itne KHamire kha kar

teri hikmat na chali aur tera bimar chala

biwiyan chaar hain aur phir bhi hasinon se shaghaf

bhai tu baiTh ke aaram se ghar-bar chala

ujrat-e-ishq nahin deta na de bhaD mein ja

le tere dam se ab tera giraftar chala

sansani-KHez use aur koi shai na mili

meri taswir se wo sham ka aKHbar chala

ye bhi achchha hai ki sahra mein banaya hai makan

ab kirae pe yahan saya-e-diwar chala

ek adakar ruka hai to hua utna hujum!!

muD ke dekha na kisi ne jo qalamkar chala

chheD mahbub se le Dubegi kashti 'jaidi'

aankh se dekh use hath se patwar chala