aage jamal-e-yar ke mazur ho gaya

aage jamāl-e-yār ke ma.azūr ho gayā

gul ik chaman meñ dīda-e-be-nūr ho gayā

ik chashm-e-muntazar hai ki dekhe hai kab se raah

joñ zaḳhm terī duurī meñ nāsūr ho gayā

qismat to dekh shaiḳh ko jab lahar aa.ī tab

darvāza shīra ḳhāne kā ma.amūr ho gayā

pahuñchā qarīb marg ke vo said-e-nā-qubūl

jo terī said-e-gāh se Tak duur ho gayā

dekhā ye nāv-nosh ki nīsh-e-firāq se

siina tamām ḳhāna-e-zambūr ho gayā

is māh-e-chārdah kā chhape ishq kyūñke aah

ab to tamām shahr meñ mash.hūr ho gayā

shāyad kaso ke dil ko lagī us galī meñ choT

merī baġhal meñ shīsha-e-dil chuur ho gayā

lāsha mirā tasallī na zer-e-zamīñ huā

jab tak na aan kar vo sar-e-gor ho gayā

dekhā jo maiñ ne yaar to vo 'mīr' hī nahīñ

tere ġham-e-firāq meñ ranjūr ho gayā

aage jamal-e-yar ke mazur ho gaya

gul ek chaman mein dida-e-be-nur ho gaya

ek chashm-e-muntazar hai ki dekhe hai kab se rah

jon zaKHm teri duri mein nasur ho gaya

qismat to dekh shaiKH ko jab lahar aai tab

darwaza shira KHane ka mamur ho gaya

pahuncha qarib marg ke wo said-e-na-qubul

jo teri said-e-gah se Tak dur ho gaya

dekha ye naw-nosh ki nish-e-firaq se

sina tamam KHana-e-zambur ho gaya

is mah-e-chaardah ka chhape ishq kyunke aah

ab to tamam shahr mein mashhur ho gaya

shayad kaso ke dil ko lagi us gali mein choT

meri baghal mein shisha-e-dil chur ho gaya

lasha mera tasalli na zer-e-zamin hua

jab tak na aan kar wo sar-e-gor ho gaya

dekha jo main ne yar to wo 'mir' hi nahin

tere gham-e-firaq mein ranjur ho gaya