aisa tera rahguzar na hoga

aisā tirā rahguzar na hogā

har gaam pe jis meñ sar na hogā

kyā in ne nashe meñ mujh ko maarā

itnā bhī tū be-ḳhabar na hogā

dhokā hai tamām bahr duniyā

dekhegā ki hoñT tar na hogā

aa.ī jo shikast ā.īne par

rū-e-dil yaar idhar na hogā

dashnoñ se kisī kā itnā zālim

TukḌe TukḌe jigar na hogā

ab dil ke ta.iiñ diyā to samjhā

mehnat-zadoñ ke jigar na hogā

duniyā kī na kar tū ḳhvāst-gārī

us se kabhū bahra-var na hogā

aa ḳhāna-ḳharābī apnī mat kar

qahba hai ye us se ghar na hogā

ho us se jahāñ siyāh tad bhī

naale meñ mire asar na hogā

phir nauhagarī kahāñ jahāñ meñ

mātam-zada 'mīr' agar na hogā

aisa tera rahguzar na hoga

har gam pe jis mein sar na hoga

kya in ne nashe mein mujh ko mara

itna bhi tu be-KHabar na hoga

dhoka hai tamam bahr duniya

dekhega ki honT tar na hoga

aai jo shikast aaine par

ru-e-dil yar idhar na hoga

dashnon se kisi ka itna zalim

TukDe TukDe jigar na hoga

ab dil ke tain diya to samjha

mehnat-zadon ke jigar na hoga

duniya ki na kar tu KHwast-gari

us se kabhu bahra-war na hoga

aa KHana-KHarabi apni mat kar

qahba hai ye us se ghar na hoga

ho us se jahan siyah tad bhi

nale mein mere asar na hoga

phir nauhagari kahan jahan mein

matam-zada 'mir' agar na hoga