baat kahte ji ka jaana ho gaya

baat kahte jī kā jaanā ho gayā

marnā āshiq kā bahāna ho gayā

jā-e-būdan to na thī duniyā-e-dūñ

ittifāqan apnā aanā ho gayā

maah us ko kah ke saare shahr meñ

mujh ko mushkil muñh dikhānā ho gayā

kar rakhā ta.avīz tiflī meñ jise

ab so vo laḌkā syānā ho gayā

us balā se aah maiñ ġhāfil rahā

yak-ba-yak dil kā lagānā ho gayā

kunj-e-lab se yaar ke uchTā na Tuk

al-ġharaz dil kā Thikānā ho gayā

rafta rafta us parī ke ishq meñ

'mīr' sā daanā divāna ho gayā

baat kahte ji ka jaana ho gaya

marna aashiq ka bahana ho gaya

ja-e-budan to na thi duniya-e-dun

ittifaqan apna aana ho gaya

mah us ko kah ke sare shahr mein

mujh ko mushkil munh dikhana ho gaya

kar rakha tawiz tifli mein jise

ab so wo laDka syana ho gaya

us bala se aah main ghafil raha

yak-ba-yak dil ka lagana ho gaya

kunj-e-lab se yar ke uchTa na Tuk

al-gharaz dil ka Thikana ho gaya

rafta rafta us pari ke ishq mein

'mir' sa dana diwana ho gaya