dad-fariyaad ja-ba-ja kariye

dād-fariyād jā-ba-jā kariye

shāyad us ke bhī dil meñ jā kariye

ab sulagne lagī hai chhātī bhī

ya.anī muddat paḌe jalā kariye

chashm-o-dil jaan mā.il-e-ḳhūbāñ

badī yāroñ kī kyā kiyā kariye

dekheñ kab tak rahe hai ye sohbat

gāliyāñ khā.iye duā kariye

kuchh kaheñ to kahe hai ye na kaho

kyūñkar iz.hār-e-mudda.ā kariye

ittifāq un kā maare Daale hai

nāz-o-andāz ko judā kariye

eid hī kāshke rahe har roz

sub.h us ke gale lagā kariye

raah takne ko bhī nihāyat hai

muntazir kab talak rahā kariye

hastī mauhūm-o-yak-sar-o-gardan

saiñkaḌoñ kyūñke haq adā kariye

qaaf

vo nahīñ sar-guzasht suntā 'mīr'

yuuñ kahānī sī kyā kahā kariye

mutarattib ho nafā jo kuchh bhī

dil kī bīmārī kī davā kariye

so to har roz hai batar ahvāl

mutahayyar haiñ aah kyā kariye

dad-fariyaad ja-ba-ja kariye

shayad us ke bhi dil mein ja kariye

ab sulagne lagi hai chhati bhi

yani muddat paDe jala kariye

chashm-o-dil jaan mail-e-KHuban

badi yaron ki kya kiya kariye

dekhen kab tak rahe hai ye sohbat

galiyan khaiye dua kariye

kuchh kahen to kahe hai ye na kaho

kyunkar izhaar-e-muddaa kariye

ittifaq un ka mare Dale hai

naz-o-andaz ko juda kariye

eid hi kashke rahe har roz

subh us ke gale laga kariye

rah takne ko bhi nihayat hai

muntazir kab talak raha kariye

hasti mauhum-o-yak-sar-o-gardan

sainkaDon kyunke haq ada kariye

qaf

wo nahin sar-guzasht sunta 'mir'

yun kahani si kya kaha kariye

mutarattib ho nafa jo kuchh bhi

dil ki bimari ki dawa kariye

so to har roz hai batar ahwal

mutahayyar hain aah kya kariye