gul ko mahbub ham-qayas kiya

gul ko mahbūb ham-qayās kiyā

farq niklā bahut jo paas kiyā

dil ne ham ko misāl-e-ā.īna

ek aalam kā rū-shanās kiyā

kuchh nahīñ sūjhtā hameñ us bin

shauq ne ham ko be-havās kiyā

ishq meñ ham hue na dīvāne

qais kī aabrū kā paas kiyā

daur se charḳh ke nikal na sake

zo.af ne ham ko mūrtās kiyā

sub.h tak sham.a sar ko dhuntī rahī

kyā patiñge ne iltimās kiyā

tujh se kyā kyā tavaqqo.eñ thiiñ hameñ

so tire zulm ne nirās kiyā

aise vahshī kahāñ haiñ ai ḳhūbāñ

'mīr' ko tum abas udaas kiyā

gul ko mahbub ham-qayas kiya

farq nikla bahut jo pas kiya

dil ne hum ko misal-e-aina

ek aalam ka ru-shanas kiya

kuchh nahin sujhta hamein us bin

shauq ne hum ko be-hawas kiya

ishq mein hum hue na diwane

qais ki aabru ka pas kiya

daur se charKH ke nikal na sake

zoaf ne hum ko murtas kiya

subh tak shama sar ko dhunti rahi

kya patinge ne iltimas kiya

tujh se kya kya tawaqqoen thin hamein

so tere zulm ne niras kiya

aise wahshi kahan hain ai KHuban

'mir' ko tum abas udas kiya