hum par rawa jo rakhte ho jaur-o-jafa hamesh

ham par ravā jo rakhte ho jaur-o-jafā hamesh

ḳhūbī rahā kare hai mirī jaan kyā hamesh

kis e.atibār dil ke ta.iiñ gul kaheñ haiñ log

mujh paas to muñdī hī kalī sā rahā hamesh

kuchh ahd meñ hamāre mohabbat huī hai nang

aapas meñ varna rasm thī mehr-o-vafā hamesh

fursat maraz se dil ke hameñ kab huī tanik

thoḌī bahut chalī hī ga.ī hai davā hamesh

ab eid bhī baġhair mile us ke hai dahā

rahtā thā jo hamāre gale hī lagā hamesh

ham to jo raftanī haiñ mile hī raheñ to ḳhuub

rahtā nahīñ hai koī baġhair-az-ḳhudā hamesh

vāqif nahīñ huuñ 'mīr' se to par tamām shab

kartā hai shor aan ke ik be-navā hamesh

hum par rawa jo rakhte ho jaur-o-jafa hamesh

KHubi raha kare hai meri jaan kya hamesh

kis eatibar dil ke tain gul kahen hain log

mujh pas to mundi hi kali sa raha hamesh

kuchh ahd mein hamare mohabbat hui hai nang

aapas mein warna rasm thi mehr-o-wafa hamesh

fursat maraz se dil ke hamein kab hui tanik

thoDi bahut chali hi gai hai dawa hamesh

ab eid bhi baghair mile us ke hai daha

rahta tha jo hamare gale hi laga hamesh

hum to jo raftani hain mile hi rahen to KHub

rahta nahin hai koi baghair-az-KHuda hamesh

waqif nahin hun 'mir' se to par tamam shab

karta hai shor aan ke ek be-nawa hamesh