ishq ne KHwar-o-zalil kiya hum sar ko bikhere phirte hain

ishq ne ḳhvār-o-zalīl kiyā ham sar ko bikhere phirte haiñ

soz-o-dard-o-dāġh-o-alam sab jī ko ghere phirte haiñ

har shab huuñ sar-gashta-o-nālāñ us bin kūcha-e-barzan meñ

yaas nahīñ hai ab bhī dekhūñ kab din mere phirte haiñ

dil lashkar meñ ek sipāhī-zāde ne ham se chhīn liyā

ham darvesh talab meñ us kī Dere Dere phirte haiñ

be-ḳhud us kī zulf-o-ruḳh ke kaahe ko aap meñ phir aa.e

ham kahte haiñ tasallī-e-dil ko sāñjh savere phirte haiñ

naqsh kisū kā darūn-e-sīna garm talab haiñ vaise rang

jaisī ḳhayālī paas liye tasvīr chitere phirte haiñ

barse agar shamshīr saroñ par muñh moḌeñ zinhār nahīñ

sīdhe jaane vaale udhar ke kis ke phere phirte haiñ

pā-e-nigār ālūda kahīñ sāñjh ko 'mīr' ne dekhe the

sub.h tak ab bhī āñkhoñ meñ us kī paañv tere phirte haiñ

ishq ne KHwar-o-zalil kiya hum sar ko bikhere phirte hain

soz-o-dard-o-dagh-o-alam sab ji ko ghere phirte hain

har shab hun sar-gashta-o-nalan us bin kucha-e-barzan mein

yas nahin hai ab bhi dekhun kab din mere phirte hain

dil lashkar mein ek sipahi-zade ne hum se chhin liya

hum darwesh talab mein us ki Dere Dere phirte hain

be-KHud us ki zulf-o-ruKH ke kahe ko aap mein phir aae

hum kahte hain tasalli-e-dil ko sanjh sawere phirte hain

naqsh kisu ka darun-e-sina garm talab hain waise rang

jaisi KHayali pas liye taswir chitere phirte hain

barse agar shamshir saron par munh moDen zinhaar nahin

sidhe jaane wale udhar ke kis ke phere phirte hain

pa-e-nigar aaluda kahin sanjh ko 'mir' ne dekhe the

subh tak ab bhi aankhon mein us ki panw tere phirte hain