jaane de mat is qadar ab zulf-o-KHatt-o-Khaal dekh

jaane de mat is qadar ab zulf-o-ḳhatt-o-ḳhāl dekh

haal kuchh bhī tujh meñ hai ai 'mīr' apnā haal dekh

kyā mirī tūl-e-pareshānī kī hairat ham-nafas

āñkheñ to dī haiñ ḳhudā ne us ke lipTe baal dekh

dāman-e-sahrā meñ kyā vus.at hai jo dil meñ nahīñ

muuñd kar āñkheñ garebāñ meñ bhī Tuk sar Daal dekh

chashm-o-dil kā us se lag jaanā to thā jis tis tarah

jī bhī un bāloñ meñ uljhā aur ye janjāl dekh

garche us mah kī judā.ī meñ mujhe barsoñ hue

lekin ai aḳhtar-shanās ab kā hai kaisā saal dekh

kab nazar merī paḌegī us ke rū-e-ḳhūb par

ham-nashīñ Tuk tū bhī mus.haf khol kar to faal dekh

Thokareñ dil ko lage haiñ jab chale hai raah tū

ye ḳhirām-e-nāz hai zālim Tuk apnī chaal dekh

jaane de mat is qadar ab zulf-o-KHatt-o-KHal dekh

haal kuchh bhi tujh mein hai ai 'mir' apna haal dekh

kya meri tul-e-pareshani ki hairat ham-nafas

aankhen to di hain KHuda ne us ke lipTe baal dekh

daman-e-sahra mein kya wusat hai jo dil mein nahin

mund kar aankhen gareban mein bhi Tuk sar Dal dekh

chashm-o-dil ka us se lag jaana to tha jis tis tarah

ji bhi un baalon mein uljha aur ye janjal dekh

garche us mah ki judai mein mujhe barson hue

lekin ai aKHtar-shanas ab ka hai kaisa sal dekh

kab nazar meri paDegi us ke ru-e-KHub par

ham-nashin Tuk tu bhi mushaf khol kar to fal dekh

Thokaren dil ko lage hain jab chale hai rah tu

ye KHiram-e-naz hai zalim Tuk apni chaal dekh