jab gul kahe hai apne tain yar ke ru sa

jab gul kahe hai apne ta.iiñ yaar ke rū sā

tab āñkhoñ tale merī utartā hai lahū sā

tahqīq karūñ kis se haqīqat ke nashe ko

ḳhizr aab use kahtā hai ātish kahe muusā

kyā duur hai sharbat pe agar qand ke thūke

Tuk jin ne tire sharbatī in hoñToñ ko chūsā

dum-lāba kareñ shaiḳh rakheñ shamle to kyā hai

honā magar āsān hai us ke sag-e-kū sā

tā۔bīr jise karte haiñ hangāma-e-mahshar

vo yaar ke kūche kā hai kuchh shor ġhulū sā

ārā.ish-e-darveshī bhī apnī nahīñ be lutf

hai boriye kā naqsh mire tan pe utū sā

kab kī hai hadīs us se suḳhan karne kī maiñ ne

kyā 'mīr' se bole koī hai behuda-go sā

jab gul kahe hai apne tain yar ke ru sa

tab aankhon tale meri utarta hai lahu sa

tahqiq karun kis se haqiqat ke nashe ko

KHizr aab use kahta hai aatish kahe musa

kya dur hai sharbat pe agar qand ke thuke

Tuk jin ne tere sharbati in honTon ko chusa

dum-laba karen shaiKH rakhen shamle to kya hai

hona magar aasan hai us ke sag-e-ku sa

ta۔bir jise karte hain hangama-e-mahshar

wo yar ke kuche ka hai kuchh shor ghulu sa

aaraish-e-darweshi bhi apni nahin be lutf

hai boriye ka naqsh mere tan pe utu sa

kab ki hai hadis us se suKHan karne ki main ne

kya 'mir' se bole koi hai behuda-go sa