josh-e-dil aae baham dida-e-giryan hue

josh-e-dil aa.e baham dīda-e-giryān hue

kitne ik ashk hue jam' ki tūfān hue

kyā chhupeñ shahr-e-mohabbat meñ tire ḳhāna-ḳharāb

ghar ke ghar un ke haiñ is bastī meñ vīrān hue

kis ne lī ruḳhsat-e-parvāz pas-az-marg nasīm

musht-e-par baaġh meñ aate hī pareshān hue

sabza-o-lāla-o-gul abr-o-havā hai mai de

saaqī ham tauba ke karne se pashemān hue

dekhte phirte haiñ muñh sab kā sahar ā.īne

jalva-gar ho ki ye tujh bin bahut hairān hue

dā’vā-e-ḳhush-dahanī garche use thā lekin

dekh kar muñh ko tire gul ke ta.iiñ kaan hue

jām-e-ḳhūñ bin nahīñ miltā hai hameñ sub.h ko aab

jab se is charḳh-e-siyah-kāsa ke mehmān hue

apne jī hī ne na chāhā ki piyeñ āb-e-hayāt

yuuñ to ham 'mīr' usī chashme pe be-jān hue

josh-e-dil aae baham dida-e-giryan hue

kitne ek ashk hue jam' ki tufan hue

kya chhupen shahr-e-mohabbat mein tere KHana-KHarab

ghar ke ghar un ke hain is basti mein viran hue

kis ne li ruKHsat-e-parwaz pas-az-marg nasim

musht-e-par bagh mein aate hi pareshan hue

sabza-o-lala-o-gul abr-o-hawa hai mai de

saqi hum tauba ke karne se pasheman hue

dekhte phirte hain munh sab ka sahar aaine

jalwa-gar ho ki ye tujh bin bahut hairan hue

da’wa-e-KHush-dahani garche use tha lekin

dekh kar munh ko tere gul ke tain kan hue

jam-e-KHun bin nahin milta hai hamein subh ko aab

jab se is charKH-e-siyah-kasa ke mehman hue

apne ji hi ne na chaha ki piyen aab-e-hayat

yun to hum 'mir' usi chashme pe be-jaan hue