KHubi yahi nahin hai ki andaz-o-naz ho

ḳhūbī yahī nahīñ hai ki andāz-o-nāz ho

māshūq kā hai husn agar dil-navāz ho

sajde kā kyā muzā.iqa mehrāb-e-teġh meñ

par ye to ho ki na.ash pe merī namāz ho

ik dam to ham meñ teġh ko tū be-dareġh khīñch

tā ishq meñ havas meñ tanik imtiyāz ho

nazdīk soz-e-sīnā se rakh apne qalb ko

vo dil hī kīmiyā hai jo garm-e-gudāz ho

hai farq hī meñ ḳhair na kar ārzū-e-vasl

mil baiThiye jo us se to shikva darāz ho

juuñ tuuñ ke us kī chaah kā parda kiyā hai maiñ

ai chashm-e-girya-nāk na ifshā-e-rāz ho

juuñ chashm-e-bismilī na muñdī āvegī nazar

jo aañkh mere ḳhūnī ke chehre pe baaz ho

ham se to ġhair-e-ijz kabhū kuchh banā na 'mīr'

ḳhush-hāl vo faqīr ki jo be-niyāz ho

KHubi yahi nahin hai ki andaz-o-naz ho

mashuq ka hai husn agar dil-nawaz ho

sajde ka kya muzaiqa mehrab-e-tegh mein

par ye to ho ki nash pe meri namaz ho

ek dam to hum mein tegh ko tu be-daregh khinch

ta ishq mein hawas mein tanik imtiyaz ho

nazdik soz-e-sina se rakh apne qalb ko

wo dil hi kimiya hai jo garm-e-gudaz ho

hai farq hi mein KHair na kar aarzu-e-wasl

mil baiThiye jo us se to shikwa daraaz ho

jun tun ke us ki chah ka parda kiya hai main

ai chashm-e-girya-nak na ifsha-e-raaz ho

jun chashm-e-bismili na mundi aawegi nazar

jo aankh mere KHuni ke chehre pe baz ho

hum se to ghair-e-ijz kabhu kuchh bana na 'mir'

KHush-haal wo faqir ki jo be-niyaz ho