kin ne kaha ki mujhse bahut kam mila karo

kin ne kahā ki mujh se bahut kam milā karo

minnat bhī maiñ karūñ to na hargiz manā karo

bande se kī hai jin ne ye ḳhasmī ḳhudā kare

us se bhī tum ḳhusūmat-e-jānī rakhā karo

anqā sā shohrā huuñ pe haqīqat meñ kuchh nahīñ

tum duur hī se naam ko mere sunā karo

bīmārī-e-jigar kī shifā se to dil hai jam.a

ab dostī se maslahatan kuchh davā karo

ham be-ḳhudān-e-majlis-e-tasvīr ab ga.e

tum baiThe intizār hamārā kiyā karo

jī mārte haiñ nāz-o-karishma bilittifāq

jiinā mirā jo chāho to in ko judā karo

maiñ ne kahā ki phuñk rahī hai tan-badan meñ aag

bolā ki ishq hai na paḌe ab jalā karo

dil jaane kā fasāna zabānoñ pe rah gayā

ab baiThe duur se ye kahānī kahā karo

ab dekhūñ us ko maiñ to mirā jī na chal paḌe

tum ho faqīr 'mīr' kabhū ye duā karo

kin ne kaha ki mujh se bahut kam mila karo

minnat bhi main karun to na hargiz mana karo

bande se ki hai jin ne ye KHasmi KHuda kare

us se bhi tum KHusumat-e-jaani rakha karo

anqa sa shohra hun pe haqiqat mein kuchh nahin

tum dur hi se nam ko mere suna karo

bimari-e-jigar ki shifa se to dil hai jama

ab dosti se maslahatan kuchh dawa karo

hum be-KHudan-e-majlis-e-taswir ab gae

tum baiThe intizar hamara kiya karo

ji marte hain naz-o-karishma bilittifaq

jina mera jo chaho to in ko juda karo

main ne kaha ki phunk rahi hai tan-badan mein aag

bola ki ishq hai na paDe ab jala karo

dil jaane ka fasana zabanon pe rah gaya

ab baiThe dur se ye kahani kaha karo

ab dekhun us ko main to mera ji na chal paDe

tum ho faqir 'mir' kabhu ye dua karo