kya ajab pal mein agar tark ho us se jaan ka

kyā ajab pal meñ agar tark ho us se jaañ kā

ho jo zaḳhmī kabhū barham-zadan-e-mizhgāñ kā

uThte palkoñ ke gire paḌte haiñ lākhoñ aañsū

Dol Daalā hai mirī āñkhoñ ne ab tūfāñ kā

jalva-e-māh tah-e-abr tanik bhuul gayā

un ne sote meñ dupaTTe se jo muñh ko Dhāñkā

lahū lagtā hai Tapakne jo palak mārūñ huuñ

ab to ye rang hai is dīda-e-ashk-afshāñ kā

sākin-e-kū ko tire kab hai tamāshe kā dimāġh

aa.ī firdaus bhī chal kar na udhar ko jhāñkā

uTh gayā ek to ik marne ko aa baiThe hai

qā.eda hai yahī muddat se hamāre haañ kā

kār-e-islām hai mushkil tire ḳhāl-o-ḳhat se

rahzan-e-dīñ hai koī duzd koī īmāñ kā

chāra-e-ishq ba-juz marg nahīñ kuchh ai 'mīr'

is maraz meñ hai abas fikr tumheñ darmāñ kā

kya ajab pal mein agar tark ho us se jaan ka

ho jo zaKHmi kabhu barham-zadan-e-mizhgan ka

uThte palkon ke gire paDte hain lakhon aansu

Dol Dala hai meri aankhon ne ab tufan ka

jalwa-e-mah tah-e-abr tanik bhul gaya

un ne sote mein dupaTTe se jo munh ko Dhanka

lahu lagta hai Tapakne jo palak marun hun

ab to ye rang hai is dida-e-ashk-afshan ka

sakin-e-ku ko tere kab hai tamashe ka dimagh

aai firdaus bhi chal kar na udhar ko jhanka

uTh gaya ek to ek marne ko aa baiThe hai

qaeda hai yahi muddat se hamare han ka

kar-e-islam hai mushkil tere KHal-o-KHat se

rahzan-e-din hai koi duzd koi iman ka

chaara-e-ishq ba-juz marg nahin kuchh ai 'mir'

is maraz mein hai abas fikr tumhein darman ka