kya ishq-e-KHana-soz ke dil mein chhupi hai aag

kyā ishq-e-ḳhāna-soz ke dil meñ chhupī hai aag

ik saare tan-badan meñ mire faq rahī hai aag

gulshan bharā hai lāla-o-gul se agarche sab

par us baġhair apne to bhā.eñ lagī hai aag

paañv meñ paḌ ga.e haiñ phaphole mire tamām

har gaam rāh-e-ishq meñ goyā dabī hai aag

jal-jal ke sab imārat-e-dil ḳhaak ho ga.ī

kaise nagar ko aah mohabbat ne dī hai aag

ab garm-o-sard-e-dahr se yaksāñ nahīñ hai haal

paanī hai dil hamārā kabhī to kabhī hai aag

kyūñkar na tab.a-e-ātishīñ us kī hameñ jalā.e

ham musht-e-ḳhas kā hukm rakheñ vo parī hai aag

kab lag sake hai ishq-e-jahāñ-soz ko havas

maahī kī ziist aab samundar kā jī hai aag

roz-e-azal se aate haiñ hote jigar kabāb

kyā āj-kal se ishq kī yaaro jalī hai aag

angāre se na girte the aage jigar ke laḳht

jab tab hamārī god meñ ab to bharī hai aag

yā-rab hamesha jaltī hī rahtī haiñ chhātiyāñ

ye kaisī āshiqoñ ke diloñ meñ rakhī hai aag

afsurdagī-e-soḳhta-jānāñ hai qahr 'mīr'

dāman ko Tuk hilā ki diloñ kī bujhī hai aag

kya ishq-e-KHana-soz ke dil mein chhupi hai aag

ek sare tan-badan mein mere faq rahi hai aag

gulshan bhara hai lala-o-gul se agarche sab

par us baghair apne to bhaen lagi hai aag

panw mein paD gae hain phaphole mere tamam

har gam rah-e-ishq mein goya dabi hai aag

jal-jal ke sab imarat-e-dil KHak ho gai

kaise nagar ko aah mohabbat ne di hai aag

ab garm-o-sard-e-dahr se yaksan nahin hai haal

pani hai dil hamara kabhi to kabhi hai aag

kyunkar na taba-e-atishin us ki hamein jalae

hum musht-e-KHas ka hukm rakhen wo pari hai aag

kab lag sake hai ishq-e-jahan-soz ko hawas

mahi ki zist aab samundar ka ji hai aag

roz-e-azal se aate hain hote jigar kabab

kya aaj-kal se ishq ki yaro jali hai aag

angare se na girte the aage jigar ke laKHt

jab tab hamari god mein ab to bhari hai aag

ya-rab hamesha jalti hi rahti hain chhatiyan

ye kaisi aashiqon ke dilon mein rakhi hai aag

afsurdagi-e-soKHta-jaanan hai qahr 'mir'

daman ko Tuk hila ki dilon ki bujhi hai aag