liye dagh sar par jo aai thi shama

liye daaġh sar par jo aa.ī thī sham.a

sahar tak sab un ne hī khaa.ī thī sham.a

patange ke haq meñ to behtar huī

agar mom kī bhī banā.ī thī sham.a

na us mah se raushan thī shab bazm meñ

nikālā thā us ko chhupā.ī thī sham.a

vahī saath thā mere shab-gīr meñ

ki taab us ke ruḳh kī na laa.ī thī sham.a

patang aur vo kyoñ na bāham jaleñ

kahīñ se magar ik lag aa.ī thī sham.a

faroġh us ke chehre kā thā parda-dar

huā kyā jo ham ne bujhā.ī thī sham.a

taf-e-dil se 'mīr' ik kaf-e-ḳhāk hai

mirī ḳhaak par kyoñ jalā.ī thī sham.a

liye dagh sar par jo aai thi shama

sahar tak sab un ne hi khai thi shama

patange ke haq mein to behtar hui

agar mom ki bhi banai thi shama

na us mah se raushan thi shab bazm mein

nikala tha us ko chhupai thi shama

wahi sath tha mere shab-gir mein

ki tab us ke ruKH ki na lai thi shama

patang aur wo kyon na baham jalen

kahin se magar ek lag aai thi shama

farogh us ke chehre ka tha parda-dar

hua kya jo hum ne bujhai thi shama

taf-e-dil se 'mir' ek kaf-e-KHak hai

meri KHak par kyon jalai thi shama