malum nahin kya hai lab-e-surKH-e-butan mein

ma.alūm nahīñ kyā hai lab-e-surḳh-e-butāñ meñ

us ātish-e-ḳhāmosh kā hai shor jahāñ meñ

yūsuf ke ta.iiñ dekh na kyoñ band hoñ bāzār

ye jins nikaltī nahīñ har ik kī dukāñ meñ

yak parcha-e-ash.ār se muñh bāñdhe sabhoñ ke

jaadū thā mire ḳhāme kī goyā ki zabāñ meñ

ye dil jo shikasta hai so be-lutf nahīñ hai

Thahro koī dam aan ke is TuuTe makāñ meñ

maiñ lag ke gale ḳhuub hī royā lab-e-jū par

miltī thī tarah us kī bahut sarv-e-ravāñ meñ

kyā qahr huā dil jo diyā laḌkoñ ko maiñ ne

charchā hai yahī shahr ke ab pīr-o-javāñ meñ

ve yāsman-e-tāza-shagufta meñ kahāñ 'mīr'

paa.e ga.e lutf us ke jo paañv ke nishāñ meñ

malum nahin kya hai lab-e-surKH-e-butan mein

us aatish-e-KHamosh ka hai shor jahan mein

yusuf ke tain dekh na kyon band hon bazar

ye jins nikalti nahin har ek ki dukan mein

yak parcha-e-ashaar se munh bandhe sabhon ke

jadu tha mere KHame ki goya ki zaban mein

ye dil jo shikasta hai so be-lutf nahin hai

Thahro koi dam aan ke is TuTe makan mein

main lag ke gale KHub hi roya lab-e-ju par

milti thi tarah us ki bahut sarw-e-rawan mein

kya qahr hua dil jo diya laDkon ko main ne

charcha hai yahi shahr ke ab pir-o-jawan mein

we yasman-e-taza-shagufta mein kahan 'mir'

pae gae lutf us ke jo panw ke nishan mein