manda hai iKHtilat ka bazar aaj-kal

manda hai iḳhtilāt kā bāzār āj-kal

lagtā nahīñ hai dil kā ḳharīdār āj-kal

is mohlat-e-do-roza meñ ḳhatre hazār haiñ

achchhā hai rah sako jo ḳhabar-dār āj-kal

aubāshoñ hī ke ghar tujhe paane lage haiñ roz

maarā paḌegā koī talabgār āj-kal

milne kī raat dāḳhil-e-ayyām kyā nahīñ

barsoñ hue kahāñ ta.iiñ ai yaar āj-kal

gulzār ho rahe hai mire dam se kū-e-yār

ik rang par hai dīda-e-ḳhūñ-bār āj-kal

tā-shām apnā kaam khiñche kyūñke dekhiye

paḌtī nahīñ hai jī ko jafā-kār āj-kal

ka.abe talak to sunte haiñ vīrāna-o-ḳharāb

ābād hai so ḳhāna-e-ḳhummār āj-kal

Thokar diloñ ko lagne lagī hai ḳhirām meñ

lāvegī ik balā tirī raftār āj-kal

aisā hī muġhbachoñ meñ jo aanā hai shaiḳh jī

to jā rahe haiñ jubba-o-dastār āj-kal

hairān maiñ hī haal kī tadbīr meñ nahīñ

har ik ko shahr meñ hai ye āzār āj-kal

achchhā nahīñ hai 'mīr' kā ahvāl in dinoñ

ġhālib ki ho chukegā ye bīmār āj-kal

manda hai iKHtilat ka bazar aaj-kal

lagta nahin hai dil ka KHaridar aaj-kal

is mohlat-e-do-roza mein KHatre hazar hain

achchha hai rah sako jo KHabar-dar aaj-kal

aubashon hi ke ghar tujhe pane lage hain roz

mara paDega koi talabgar aaj-kal

milne ki raat daKHil-e-ayyam kya nahin

barson hue kahan tain ai yar aaj-kal

gulzar ho rahe hai mere dam se ku-e-yar

ek rang par hai dida-e-KHun-bar aaj-kal

ta-sham apna kaam khinche kyunke dekhiye

paDti nahin hai ji ko jafa-kar aaj-kal

kabe talak to sunte hain virana-o-KHarab

aabaad hai so KHana-e-KHummar aaj-kal

Thokar dilon ko lagne lagi hai KHiram mein

lawegi ek bala teri raftar aaj-kal

aisa hi mughbachon mein jo aana hai shaiKH ji

to ja rahe hain jubba-o-dastar aaj-kal

hairan main hi haal ki tadbir mein nahin

har ek ko shahr mein hai ye aazar aaj-kal

achchha nahin hai 'mir' ka ahwal in dinon

ghaalib ki ho chukega ye bimar aaj-kal