mat ho dushman ai falak mujh paemal-e-rah ka

mat ho dushman ai falak mujh pā.emāl-e-rāh kā

ḳhāk-uftāda huuñ maiñ bhī ik faqīr allāh kā

saiñkaḌoñ tarheñ nikāleñ yaar ke aane kī lek

'uzr hī jā hai chalā us ke dil-e-nā-ḳhvāh kā

gar koī pīr-e-muġhāñ mujh ko kare to dekhe phir

mai-kada saare kā saarā sirf hai allāh kā

kaash tere ġham-rasīdoñ ko bulāveñ hashr meñ

zulm hai yak ḳhalq par āshob in kī aah kā

jo sunā hushiyār us maiḳhāne meñ thā be-ḳhabar

shauq hī baaqī rahā ham ko dil-e-āgāh kā

bāñdh mat rone kā taar ai nā-qabāhat-fahm chashm

is se paayā jaa.e hai sar-rishta jī kī chaah kā

shaiḳh mat kar zikr har sā'at qayāmat kā ki hai

'arsa-e-mahshar namūna us kī bāzī-gāh kā

shahr meñ kis muñh se aave sāmne tere ki shoḳh

jhā.iyoñ se bhar rahā hai saarā chehra maah kā

sar faro laatī nahīñ himmat mirī har ik ke paas

huuñ gadā-e-āstāñ maiñ 'mīr' hazrat shaah kā

mat ho dushman ai falak mujh paemal-e-rah ka

KHak-uftada hun main bhi ek faqir allah ka

sainkaDon tarhen nikalen yar ke aane ki lek

'uzr hi ja hai chala us ke dil-e-na-KHwah ka

gar koi pir-e-mughan mujh ko kare to dekhe phir

mai-kada sare ka sara sirf hai allah ka

kash tere gham-rasidon ko bulawen hashr mein

zulm hai yak KHalq par aashob in ki aah ka

jo suna hushiyar us maiKHane mein tha be-KHabar

shauq hi baqi raha hum ko dil-e-agah ka

bandh mat rone ka tar ai na-qabahat-fahm chashm

is se paya jae hai sar-rishta ji ki chah ka

shaiKH mat kar zikr har sa'at qayamat ka ki hai

'arsa-e-mahshar namuna us ki bazi-gah ka

shahr mein kis munh se aawe samne tere ki shoKH

jhaiyon se bhar raha hai sara chehra mah ka

sar faro lati nahin himmat meri har ek ke pas

hun gada-e-astan main 'mir' hazrat shah ka