وہ نہیں اب کہ فریبوں سے لگا لیتے ہیں

وہ نہیں اب کہ فریبوں سے لگا لیتے ہیں

ہم جو دیکھیں ہیں تو وے آنکھ چھپا لیتے ہیں

کچھ تفاوت نہیں ہستی و عدم میں ہم بھی

اٹھ کے اب قافلۂ رفتہ کو جا لیتے ہیں

نازکی ہائے رے طالع کی نکوئی سے کبھو

پھول سا ہاتھوں میں ہم اس کو اٹھا لیتے ہیں

صحبت آخر کو بگڑتی ہے سخن سازی سے

کیا در انداز بھی اک بات بنا لیتے ہیں

ہم فقیروں کو کچھ آزار تمہیں دیتے ہو

یوں تو اس فرقے سے سب لوگ دعا لیتے ہیں

چاک سینے کے ہمارے نہیں سینے اچھے

انہیں رخنوں سے دل و جان ہوا لیتے ہیں

میرؔ کیا سادے ہیں بیمار ہوئے جس کے سبب

اسی عطار کے لڑکے سے دوا لیتے ہیں