wo nahin ab ki farebon se laga lete hain

vo nahīñ ab ki fareboñ se lagā lete haiñ

ham jo dekheñ haiñ to ve aañkh chhupā lete haiñ

kuchh tafāvut nahīñ hastī-o-adam meñ ham bhī

uTh ke ab qāfila-e-rafta ko jā lete haiñ

nāzukī haa.e re tāle.a kī nikoī se kabhū

phuul sā hāthoñ meñ ham us ko uThā lete haiñ

sohbat āḳhir ko bigaḌtī hai suḳhan-sāzī se

kyā dar-andāz bhī ik baat banā lete haiñ

ham faqīroñ ko kuchh āzār tumhīñ dete ho

yuuñ to is firqe se sab log duā lete haiñ

chaak siine ke hamāre nahīñ siine achchhe

inhīñ raḳhnoñ se dil-o-jān havā lete haiñ

'mīr' kyā saade haiñ bīmār hue jis ke sabab

usī attār ke laḌke se davā lete haiñ

wo nahin ab ki farebon se laga lete hain

hum jo dekhen hain to we aankh chhupa lete hain

kuchh tafawut nahin hasti-o-adam mein hum bhi

uTh ke ab qafila-e-rafta ko ja lete hain

nazuki hae re talea ki nikoi se kabhu

phul sa hathon mein hum us ko uTha lete hain

sohbat aaKHir ko bigaDti hai suKHan-sazi se

kya dar-andaz bhi ek baat bana lete hain

hum faqiron ko kuchh aazar tumhin dete ho

yun to is firqe se sab log dua lete hain

chaak sine ke hamare nahin sine achchhe

inhin raKHnon se dil-o-jaan hawa lete hain

'mir' kya sade hain bimar hue jis ke sabab

usi attar ke laDke se dawa lete hain