qasd gar imtihan hai pyare

qasd gar imtihān hai pyāre

ab talak nīm-jān hai pyāre

sajda karne meñ sar kaTeñ haiñ jahāñ

so tirā āstān hai pyāre

guftugū reḳhte meñ ham se na kar

ye hamārī zabān hai pyāre

kaam meñ qatl ke mire tan de

ab talak mujh meñ jaan hai pyāre

yaarī laḌkoñ se mat kare un kā

ishq ….ñ hai pyāre

chhoḌ jaate haiñ dil ko tere paas

ye hamārā nishān hai pyāre

shakleñ kyā kyā kiyāñ haiñ jin ne ḳhaak

ye vahī āsmān hai pyāre

qaaf

jā chukā dil to ye yaqīnī hai

kyā ab us kā bayān hai pyāre

par tabassum ke karne se tere

kunj-e-lab par gumān hai pyāre

'mīr' amdan bhī koī martā hai

jaan hai to jahān hai pyāre

qasd gar imtihan hai pyare

ab talak nim-jaan hai pyare

sajda karne mein sar kaTen hain jahan

so tera aastan hai pyare

guftugu reKHte mein hum se na kar

ye hamari zaban hai pyare

kaam mein qatl ke mere tan de

ab talak mujh mein jaan hai pyare

yari laDkon se mat kare un ka

ishq …n hai pyare

chhoD jate hain dil ko tere pas

ye hamara nishan hai pyare

shaklen kya kya kiyan hain jin ne KHak

ye wahi aasman hai pyare

qaf

ja chuka dil to ye yaqini hai

kya ab us ka bayan hai pyare

par tabassum ke karne se tere

kunj-e-lab par guman hai pyare

'mir' amdan bhi koi marta hai

jaan hai to jahan hai pyare