sar kaT ke Dalwa diye andaz to dekho

sar kaaT ke Dalvā diye andāz to dekho

pāmāl hai sab ḳhalq-e-jahāñ-nāz to dekho

kuchh suujh nahīñ paḌtī tumheñ be-ḳhabarī se

Tuk hosh kī āñkhoñ ko karo baaz to dekho

us but se nahīñ jab ta.iiñ sohbat to nahīñ hai

ye Dol jo hotā hai ḳhudā-sāz to dekho

shab aañkh mirī lagne nahīñ detī hai bulbul

is murġh kī betābi-e-āvāz to dekho

dil ek taḌapne meñ pare arsh ke paayā

is tā.ir-e-be-bāl kī parvāz to dekho

kī zulf-o-ḳhat-o-ḳhāl ne ek aur qayāmat

tasvīr se chehre pe ye pardāz to dekho

sab 'mīr' ko dete haiñ jagah āñkhoñ par apnī

is ḳhāk-e-rah-e-ishq kā e.azāz to dekho

sar kaT ke Dalwa diye andaz to dekho

pamal hai sab KHalq-e-jahan-naz to dekho

kuchh sujh nahin paDti tumhein be-KHabari se

Tuk hosh ki aankhon ko karo baz to dekho

us but se nahin jab tain sohbat to nahin hai

ye Dol jo hota hai KHuda-saz to dekho

shab aankh meri lagne nahin deti hai bulbul

is murgh ki betabi-e-awaz to dekho

dil ek taDapne mein pare arsh ke paya

is tair-e-be-baal ki parwaz to dekho

ki zulf-o-KHat-o-KHal ne ek aur qayamat

taswir se chehre pe ye pardaz to dekho

sab 'mir' ko dete hain jagah aankhon par apni

is KHak-e-rah-e-ishq ka eazaz to dekho