تسکین درد مندوں کو یا رب شتاب دے

تسکین درد مندوں کو یا رب شتاب دے

دل کو ہمارے چین دے آنکھوں کو خواب دے

اس کا غضب سے نامہ نہ لکھنا تو سہل ہے

لوگوں کے پوچھنے کا کوئی کیا جواب دے

گل ہے بہار تب ہے جب آنکھوں میں ہو نشہ

جاتی ہے فصل گل کہیں ساقی شراب دے

وہ تیغ میری تشنۂ خوں ہو گئی ہے کند

کر رحم مجھ پہ کاشکے یار اس کو آب دے

دو چار الم جو ہوویں تو ہیں بابت بتاں

کیا درد بے شمار کا کوئی حساب دے

تار نگہ کا سوت نہیں بندھتا ضعف سے

بے جان ہے یہ رشتہ دلا اس کو تاب دے

مژگان تر کو یار کے چہرے پہ کھول میرؔ

اس آب خستہ سبزے کو ٹک آفتاب دے