thake chaara-jui se ab kya karen

thake chārā-jūī se ab kyā kareñ

kaho tum so dil kā mudāvā kareñ

gulistāñ meñ ham ġhuncha haiñ der se

kahāñ ham ko parvā ki par vā kareñ

nahīñ chāhtā jī kuchh ab sair haiñ

havas dil ko ho to tamanna kareñ

ba-ḳhud justujū meñ na us kī rahe

ham aaphī haiñ gum kis ko paidā kareñ

ġhazab hai ye andāz-e-raftār-e-ishq

chale jaa.eñ jī ham tamāshā kareñ

balā shor hai sar meñ ham kab talak

qayāmat kā hangāma barpā kareñ

kaheñ dil kī murġhān-e-gulshan se kyā

ye be-hausla ham ko rusvā kareñ

khapā ishq kā josh dil meñ bhalā

ki badnām hoveñ jo saudā kareñ

bure haal us kī galī meñ haiñ 'mīr'

jo uTh jaa.eñ vaañ se to achchhā kareñ

thake chaara-jui se ab kya karen

kaho tum so dil ka mudawa karen

gulistan mein hum ghuncha hain der se

kahan hum ko parwa ki par wa karen

nahin chahta ji kuchh ab sair hain

hawas dil ko ho to tamanna karen

ba-KHud justuju mein na us ki rahe

hum aaphi hain gum kis ko paida karen

ghazab hai ye andaz-e-raftar-e-ishq

chale jaen ji hum tamasha karen

bala shor hai sar mein hum kab talak

qayamat ka hangama barpa karen

kahen dil ki murghan-e-gulshan se kya

ye be-hausla hum ko ruswa karen

khapa ishq ka josh dil mein bhala

ki badnam howen jo sauda karen

bure haal us ki gali mein hain 'mir'

jo uTh jaen wan se to achchha karen