ان دلبروں سے رابطہ کرنا ہے کام کیا

ان دلبروں سے رابطہ کرنا ہے کام کیا

کر اک سلام پوچھنا صاحب کا نام کیا

حیرت ہے کھولیں چشم تماشا کہاں کہاں

حسن و جمال ویسا ہے اس کا خرام کیا

کی اک نگاہ گرم جہاں ان سے مل گئے

عاشق کو دلبروں سے سلام و پیام کیا

شکر خدا کہ سر نہ فرو لائے ہم کہیں

کیا جانیں سجدہ کہتے ہیں کس کو سلام کیا

اس کنج لب پہ چپکے ہوئے منہ کو رکھ کے ہم

دلچسپ اس مقام میں حرف و کلام کیا

جس جائے اس کے چہرے سے کرتے ہیں گفتگو

مرآت و ماہ و گل کا ہے اس جا مقام کیا

کہتا ہے کون بدر میں نقصان کچھ رہا

پر منہ کھلے پہ اس کے ہے ماہ تمام کیا

یہ جانوں ہوں کہ دل کو ہے اس رو و مو سے لاگ

کیا جانوں پیش آوے ہے اب صبح و شام کیا

تسبیح تک تو میرؔ نے رکھا کلال کے

وقت نماز اب بھی ہوئے تھے امام کیا