وہ ترک مست کسو کی خبر نہیں رکھتا

وہ ترک مست کسو کی خبر نہیں رکھتا

کہ میں شکار زبوں ہوں جگر نہیں رکھتا

بلا سے آنکھ جو پڑتی ہے اس کی دس جاگہ

ہمارا حال تو مد نظر نہیں رکھتا

رہے نہ کیونکے یہ دل باختہ سدا تنہا

کہ کوئی آوے کہاں میں تو گھر نہیں رکھتا

جنہوں کے دم میں ہے تاثیر اور وے ہیں لوگ

ہمارا نالۂ جاں کاہ اثر نہیں رکھتا

کہیں ہیں اب کے بہت رنگ اڑ چلا گل کا

ہزار حیف کہ میں بال و پر نہیں رکھتا

تو کوئی زور ہی نسخہ ہے اے مفرح دل

کہ طبع عشق میں ہرگز ضرر نہیں رکھتا

خدا کی اور سے ہے سب یہ اعتبار ارنہ

جو خوب دیکھو تو میں کچھ ہنر نہیں رکھتا

غلط ہے دعویٔ عشق اس فضول کا بے ریب

جو کوئی خشک لب اور چشم تر نہیں رکھتا

جدا جدا پھرے ہے میرؔ سب سے کس خاطر

خیال ملنے کا اس کے اگر نہیں رکھتا