yaad jab aati hai wo zulf-e-siyah

yaad jab aatī hai vo zulf-e-siyāh

saañp sā chhātī pe phir jaatā hai aah

khul gayā muñh ab to us mahjūb kā

kuchh suḳhan kī bhī nikal āvegī raah

sharm karnī thī mirā sar kaaT kar

so to un ne aur TeḌhī kī kulāh

yaar kā vo naaz apnā ye niyāz

dekhiye hotā hai kyūñkar yuuñ nibāh

diin meñ us kāfir-e-be-rahm ke

ajr ik rakhtā hai ḳhūn-e-be-gunāh

pattharoñ se sīna-kūbī maiñ ne kī

dil ke mātam meñ mirī chhātī sarāh

mol le chuk mujh ko āñkheñ muuñd kar

dekh to qīmat hai merī ik nigāh

lazzat-e-duniyā se kyā bahra hameñ

paas hai ranDī vale hai zo’f-e-bāh

ruuTh kar kyā aap se milne meñ lutf

hove vo bhī to kabhū Tuk ‘uzr-ḳhvāh

zabt bahuterā hī karte haiñ vale

aah ik muñh se nikal jaatī hai gaah

us ke rū ke rafta hī aa.e haiñ yaañ

aaj se to kuchh nahīñ ye jī kī chaah

dekh rahte dhoke us ruḳhsār ke

daaya muñh dhote jo kahtī maah maah

shaiḳh tū ne ḳhuub samjhā 'mīr' ko

vāh-vā ai be-haqīqat vāh-vāh

yaad jab aati hai wo zulf-e-siyah

sanp sa chhati pe phir jata hai aah

khul gaya munh ab to us mahjub ka

kuchh suKHan ki bhi nikal aawegi rah

sharm karni thi mera sar kaT kar

so to un ne aur TeDhi ki kulah

yar ka wo naz apna ye niyaz

dekhiye hota hai kyunkar yun nibah

din mein us kafir-e-be-rahm ke

ajr ek rakhta hai KHun-e-be-gunah

pattharon se sina-kubi main ne ki

dil ke matam mein meri chhati sarah

mol le chuk mujh ko aankhen mund kar

dekh to qimat hai meri ek nigah

lazzat-e-duniya se kya bahra hamein

pas hai ranDi wale hai zo’f-e-bah

ruTh kar kya aap se milne mein lutf

howe wo bhi to kabhu Tuk ‘uzr-KHwah

zabt bahutera hi karte hain wale

aah ek munh se nikal jati hai gah

us ke ru ke rafta hi aae hain yan

aaj se to kuchh nahin ye ji ki chah

dekh rahte dhoke us ruKHsar ke

daya munh dhote jo kahti mah mah

shaiKH tu ne KHub samjha 'mir' ko

wah-wa ai be-haqiqat wah-wah