apne aaqa ke madine ki taraf dekhte hain

apne aaqā ke madīne kī taraf dekhte haiñ

dil ulajhtā hai to siine kī taraf dekhte haiñ

ab ye duniyā jise chāhe use dekhe sar-e-sail

ham to bas ek safīne kī taraf dekhte haiñ

ahd-e-āsūdgī-e-jāñ ho ki daur-e-adbār

usī rahmat ke ḳhazīne kī taraf dekhte haiñ

vo jo pal-bhar meñ sar-e-arsh-e-barīñ khultā hai

bas usī nuur ke ziine kī taraf dekhte haiñ

bahr-e-tasdīq-e-sanad-nāma-e-nisbat ushshāq

muhr-e-ḳhātam ke nagīne kī taraf dekhte haiñ

dekhne vāloñ ne dekhe haiñ vo āshufta-mizāj

jo haram se bhī madīne kī taraf dekhte haiñ

apne aaqa ke madine ki taraf dekhte hain

dil ulajhta hai to sine ki taraf dekhte hain

ab ye duniya jise chahe use dekhe sar-e-sail

hum to bas ek safine ki taraf dekhte hain

ahd-e-asudgi-e-jaan ho ki daur-e-adbar

usi rahmat ke KHazine ki taraf dekhte hain

wo jo pal-bhar mein sar-e-arsh-e-barin khulta hai

bas usi nur ke zine ki taraf dekhte hain

bahr-e-tasdiq-e-sanad-nama-e-nisbat ushshaq

muhr-e-KHatam ke nagine ki taraf dekhte hain

dekhne walon ne dekhe hain wo aashufta-mizaj

jo haram se bhi madine ki taraf dekhte hain