ban aai teri shafaat se ru-siyahon ki

ban aa.ī terī shafā.at se rū-siyāhoñ kī

ki fard dāḳhil-e-daftar huī gunāhoñ kī

tire faqīr dikhā.eñ jo martaba apnā

nazar se utre chaḌhī bārgāh shāhoñ kī

zarā bhī chashm-e-karam ho to le uḌeñ hūreñ

samajh ke surma siyāhī mire gunāhoñ kī

ḳhushā-nasīb jo terī galī meñ dafn hue

jināñ meñ rūheñ haiñ in maġhfirat-panāhoñ kī

farishte karte haiñ dāmān-e-zulf-e-hūr se saaf

jo gard paḌtī hai us rauze par nigāhoñ kī

rukegī aa ke shafā.at tirī ḳharīdārī

khuleñgī hashr meñ jab gaThḌiyāñ gunāhoñ kī

maiñ nā-tavān huuñ pahuñchūñgā aap tak kyūñkar

ki bhiiḌ hogī qayāmat meñ uzr-ḳhvāhoñ kī

nigāh-e-lutf hai lāzim ki duur ho ye marz

dabā rahī hai siyāhī mujhe gunāhoñ kī

ḳhudā karīm mohammad shafī-e-roz-e-jazā

'amīr' kyā hai haqīqat mire gunāhoñ kī

ban aai teri shafaat se ru-siyahon ki

ki fard daKHil-e-daftar hui gunahon ki

tere faqir dikhaen jo martaba apna

nazar se utre chaDhi bargah shahon ki

zara bhi chashm-e-karam ho to le uDen huren

samajh ke surma siyahi mere gunahon ki

KHusha-nasib jo teri gali mein dafn hue

jinan mein ruhen hain in maghfirat-panahon ki

farishte karte hain daman-e-zulf-e-hur se saf

jo gard paDti hai us rauze par nigahon ki

rukegi aa ke shafaat teri KHaridari

khulengi hashr mein jab gaThDiyan gunahon ki

main na-tawan hun pahunchunga aap tak kyunkar

ki bhiD hogi qayamat mein uzr-KHwahon ki

nigah-e-lutf hai lazim ki dur ho ye marz

daba rahi hai siyahi mujhe gunahon ki

KHuda karim mohammad shafi-e-roz-e-jaza

'amir' kya hai haqiqat mere gunahon ki