chamak tujhse pate hain sab pane wale

chamak tujh se paate haiñ sab paane vaale

mirā dil bhī chamkā de chamkāne vaale

barastā nahīñ dekh kar abr-e-rahmat

badoñ par bhī barsā de barsāne vaale

madīne ke ḳhitte ḳhudā tujh ko rakkhe

ġharīboñ faqīroñ ke Thahrāne vaale

tū zinda hai vallāh tū zinda hai vallāh

mire chashm-e-‘ālam se chhup jaane vaale

maiñ mujrim huuñ aaqā mujhe saath le lo

ki raste meñ haiñ jā-ba-jā thāne vaale

haram kī zamīñ aur qadam rakh ke chalnā

are sar kā mauqa' hai o jaane vaale

tirā khā.eñ tere ġhulāmoñ se uljheñ

haiñ munkir 'ajab khāne ġhurrāne vaale

rahegā yuñhī un kā charchā rahegā

paḌe ḳhaak ho jaa.eñ jal jaane vaale

'razā' nafs dushman hai dam meñ na aanā

kahāñ tū ne dekhe haiñ chandrāne vaale

chamak tujh se pate hain sab pane wale

mera dil bhi chamka de chamkane wale

barasta nahin dekh kar abr-e-rahmat

badon par bhi barsa de barsane wale

madine ke KHitte KHuda tujh ko rakkhe

gharibon faqiron ke Thahrane wale

tu zinda hai wallah tu zinda hai wallah

mere chashm-e-‘alam se chhup jaane wale

main mujrim hun aaqa mujhe sath le lo

ki raste mein hain ja-ba-ja thane wale

haram ki zamin aur qadam rakh ke chalna

are sar ka mauqa' hai o jaane wale

tera khaen tere ghulamon se uljhen

hain munkir 'ajab khane ghurrane wale

rahega yunhi un ka charcha rahega

paDe KHak ho jaen jal jaane wale

'raza' nafs dushman hai dam mein na aana

kahan tu ne dekhe hain chandrane wale